Dette skal gje færre overdosedødsfall

– Du rullar det saman som ei pølse. Så fyrer du, seier Paul-Erik Sørensen.

Han er ein av dei med mange år bak seg som rusmisbrukar i Arendal, og viser korleis han røyker heroin i staden for å bruke sprøyte.

– Du får det ned i lungene. Jo lengre du klarer å halde, jo betre blir det, seier han og trekk ned røyken.

• Les: Trondheim og Bergen er overdose-verstingar

Betre enn injeksjon

Arendal er ein av ni norske byar som er med i eit pilotprosjekt som skal hindre fleire overdosedødsfall.

– Dette er eit betre alternativ enn å setje ein injeksjon, seier feltsjukepleiar i Arendal, Tordis Landvik.

– Ein del av skadereduksjonen er å prøve å motivere folk til å bruke røykefolie, seier ho.

Fire av fem dødsfall skuldast inntak av rusmiddel med sprøyte, ifølgje helsedirektoratet.

• Les: Her er sprayen som skal hindre dødsfall

260 dødsfall i året

– Statistikken viser at det i snitt døyr 260 av overdose på landsbasis. Til samanlikning var det 152 som døydde i trafikken i fjor, seier prosjektleiar i Arendal, Berit Bulien Jørgensen.

– Det er ganske mykje høgre tal, men vi høyrer mykje mindre om det. Ofte skuldast dødsfalla ei blanding av ulike stoff, seier ho.

Paul-Erik Sørensen har mista mange kjende i rusen.

No vil han bidra med det han kan for at færre døyr av overdose.

– Eg prøver å vere ein person som spring rundt til kameratane eg har igjen og passar på dei, seier han.

• Les: Fryktar strengare kontroll gir fleire overdosedødsfall