– Ei natt med massiv fyll over store deler av distriktet. Då er det godt at ein blir pensjonist klokka 07.45, skreiv Steinsland på Agder-politiet sin Twitter-konto.
For politiet på Agder hadde det særs hektisk natt til søndag. Mellom klokka 24 og 06 søndag morgon måtte politiet rykkje ut til 50 ordensforstyrrelsar.
– Hadde ikkje folkevett
Mange av utrykkingane var til Skandinavias største strandfest «Palmesus», som vart arrangert på bystranda i Kristiansand.
I tillegg til å ta hand om fulle personar måtte politiet rykkje ut til bystranda der det gjekk føre seg rydding etter musikkfestivalen. Politiet fekk nemleg inn fleire meldingar om «dunk-dunk-lydar».
Det viste seg at arrangørane hadde på musikk medan dei rydda opp etter arrangementet.
– Det var Palmesus som ikkje hadde folkevett til å forstå at dei plaga mange med denne støyen, skriv Steinsland på Twitter.
Elles hadde Steinsland mellom anna følgjande å melde frå si siste vakt som operasjonsleiar, før han gjekk inn i pensjonisttilværet.
– Mann med ustelt skjegg
– Ein mann i Hægebostad, med ustelt skjegg, rappa med seg pyntegjenstandar frå ein bustad etter å ha spurt om sigarettpapir, skreiv Steinsland.
– Massefyll etter Palmesus i Kristiansand sentrum.
Steinsland fekk på tampen av vakta helsing frå 110-sentralen på Agder på Twitter:
– Håpar du får ein fin og lang pensjonisttilvære.