Talentspeidar Trond Fylling hadde sett den senegalesiske U23-kapteinen i to landskampar, ei rekkje treningar og på DVD då han bestemte seg for å handle.
For på tribunen sat mellom andre Aalesund, Rosenborg og Vålerenga. I tillegg hadde Stephané Diarra Badji invitasjon frå to franske klubbar, samt ein klubb i Midt-Austen.
– «Alle» klubbar var der og det var Badji alle snakka om på tribunen. Då bestemte eg meg for å gjere det, fortel Fylling i dag.
Snappa framfor nasen
Denne novemberdagen i fjor sikra Sogndal seg spelaren som har fått mange til å heve augebryna denne sesongen. Badji spelte då for Senegal under afrikameisterskapen i Marokko.
Fylling snakka med spelaren før han kontakta klubbpresidenten i Badji sin dåverande klubb, Casa-Sport, og avtalte møte i Gambia. Deretter køyrde Fylling dei 13 timane og regelrett snappa stortalentet framfor nasen på dei andre klubbane.
- LES OGSÅ:
– Medan dei andre såg kampane, forhandla eg og alt. Eg ringde til Sogndal og bad om pengar til å handle. Det er ikkje alltid like lett når dei du ber om pengar ikkje har sett spelaren i aksjon, ler talentspeidaren.
– Solid handverk
Etter fire treningskampar og fem seriekampar er både Fylling og spelarutviklar Håvard Flo glade for at klubben lytta til råda. Badji har vore sværkt delaktig i tabellfirar Sogndal sin pangstart på eliteserien.
Badji, som også har fått sin debut på A-landslaget til Senegal, er kaptein på det senegalesiske U23-landslaget.
- LES OGSÅ:
– Det er ikkje tvil om at Trond gjorde eit solid handverk i høve til å få eigarskapen på Badji den gong, seier Flo og vedgår at Sogndal i over halvanna år har hatt namnet til Badji på blokka.
Kan vere tapt i sommar
Senegalesaren står no fram som Sogndal sitt heitaste salsobjekt. Og i sommar må Sogndal klare seg utan Badji i, truleg, to-tre kampar i samband med OL i fotballens heimland, England.
Flo utelukkar ikkje at Badji allereie då kan ta nye steg på karrieren.
- LES OGSÅ:
- LES OGSÅ:
– Det er det som er så fascinerande med fotball. Ting skjer fort og over natta. Skulle han slå til i OL, så kan det vere at han er «gone», rett og slett. Men det er ein del av fotballen og slik vi har lyst til å vere som klubb; ta hand om spelarane, få dei fram og la dei gå vidare, seier Flo.
Blir ikkje overraska
– Eg håpar ikkje at det skjer, men det vil ikkje overraske meg om han blir seld i sommar. Han er sjølvskriven på landslaget, der også Tromsø sin Kara spelar i midtforsvaret, seier Fylling.
– Men korleis fekk du nyss om Badji?
– Når du har jobba med dette ei stund, så får du etter kvart eit nettverk med gode kontaktar. Av og til tenkjer du kven i alle dagar som har tipsa om denne spelaren, men denne gong stemde alt. Rykta gjekk langt framfor spelaren.
– Har meir å gå på
I Sogndal har dei store forventingar til spelaren som i heimlandet blir skildra som ein framtidas mann.
Første gong Fylling skulle sjå Badji i aksjon, var på ei trening for olympialaget. Då hadde Badji fått raudt kort i kampen før, og var difor ikkje med på samlinga.
Då han seinare fekk sjå Badji i aksjon var ikkje Fylling i tvil over kvalitetane. Han er overtydd om at fotball-Norge framleis ikkje har sett det beste frå senegalesaren.
– Eg er ikkje overraska over at Badji har gjort det så bra, og meiner han har meir å gå på. Det har eg og sagt til han, seier Fylling.