Avsluttar jakta på eldpåsetjar i Vågsøy

– Vi har gjort relativt omfattande teknisk og taktisk etterforsking, med hovudsakleg avhøyr av vitne som har vore i bybiletet i den aktuelle perioden. Vi har ingen mistenkte i saka, seier lensmann i Vågsøy, Nils Bakke.

Det var natt til 4. juli i fjor at nokon nytta tennvæske då dei tende på inngangsdøra til den 108 år gamle trekyrkja. Flaks og nærleik brannstasjonen hindra ein storbrann, men kyrkja vart stengd i vel tre veker .

Mellom 30 og 40 personar er avhøyrde , i tillegg har politiet gjennomført ei omfattande rundspørjing i nabolaget til kyrkja. Funn på staden er analysert hos Kripos og telefontrafikken analysert .

• Les også: Sjekkar om same gjerningsmann står bak begge kyrkjebrann-forsøka

No forfattar likevel lensmannen i Vågsøy brevet til politijuristen, der han ber saka bli lagt vekk.

– Det har vore ei vanskeleg og omfattande etterforsking, men det har vore lite observasjon i området på det tidspunktet, seier Bakke.

– Betyr ei vekklegging at saka aldri vil bli oppklara?

– Dersom vi seinare får mistanke til ein person, så kan vi ta saka fram att. I rimeleg nær framtid vil vi ha saka i minne, og kunne ta den fram att om det blir aktuelt.