Arkitekt etterlyser konkurranse om nytt Skålabygg

– På grunn av tomta og bygget som er der frå før, og det spektakulære, så er eg sikker på at verdas beste arkitektar ville delteke. Ein kan tenkje seg Preikestolen, kven ville ikkje delteke i ein konkurranse om eit bygg der? Dette er same sak, seier arkitekt og friluftsmenneske Franz Midttun.

På toppen av Skåla i Loen, skal det runde og karakteristiske Skålatårnet få selskap av ei nytt overnattingsbygg. Den nye hytta er teikna gratis av arkitekt Eiliv Bjørge som ei gåve til Bergen og Hordaland turlag, som eig dagens tårn.

Kostar å halde konkurranse

– Det er kjekt at fleire kunne tenkt seg å teikne sikringsbygget. Tårnet som står der i dag er jo eit ikon, seier leiar i turlaget, Helene Ødven.

• Les også: Laurdag legg nye 2.000 på veg mot landets mest originale hytte
• Les også: Slik ser dei føre seg nybygget på Skåla

Ho seier dei ein gong før har hatt ein arkitektkonkurranse i samband med nybygg av hytter, og at det kosta 400 000 kroner. Bygget som skal settast opp på Skåla er kostnadsrekna til seks millionar kroner.

– Det er ein anerkjend arkitekt, Eilif Bjørge, som har teikna det på dugnad. Han har erfaring med å teikne bygg i vindharde og arktiske strøk. Han melde seg, og vi har ikkje gått ut med open konkurranse. Eg syns resultatet også er blitt utruleg kult.

Tusenvis av folk går kvart år på tur med Skåla som mål. Skålatårnet vart sett opp i 1891, og er etter kvart så flittig brukt, også på vinterstid at bygget lir av fuktskadar grunna oppvarming. I fleire år har turlaget difor halde på med prosjektet med å få på plass eit nytt bygg.

• Les også: Meiner nybygg vil vere svært viktig for Skålatårnet
• Les også: No går ho på friarferd for å skaffe millionar

– I siste liten

Skåla ligg i Jostedalsbreen nasjonalpark, og styret i parken har sett klare krav til eit nytt bygg. Mellom anna skal nybygget ikkje ta glansen av dagens tårn, og det er teke omsyn til plassering, høgde og materialval.

– Det som er gjort frå Bergen turlag er veldig bra, og dei har gjort eit godt stykke arbeid. Vi har vore inne i prosessen og godkjent planar, seier Sven Flo, som er ordførar i Stryn og nestleiar i nasjonalparkstyret.

Han ser positivt på innspelet frå arkitekt Midttun, men meiner det kjem lovleg seint. For allereie til hausten håpar turlaget å kome i gang med arbeidet.

– Det er ei siste krampetrekning for å få dei involverte til å sjå kva meirverdi ein slik konkurranse ville hatt. Ikkje berre for Loen og Stryn, men for heile Nordvestlandet, seier Midttun.