Formannskapet i Stryn skal i dag diskutere namnet etter at saka er spelt inn av styret i reiselivsorganisasjonen. Men næringsdirektøren seier kommunen burde bruke tida til å diskutere innhaldet i staden.
– Å diskutere namn på selskapet akkurat no, er ei avsporing, seier han.
- LES OGSÅ:
Reisemål Stryn og Nordfjord har i 16 år jobba for å få fleire turistar til regionen og i omtrent like mange år har namnet vekt debatt. Fleire meiner Stryn ikkje burde vere ein del av namnet når organisasjonen skal jobbe for heile regionen.
Meiner det er feil fokus
I haust bad reiselivsorganisasjonen eigarkommunane og eigarane om innspel i namnedebatten. Fylkeskommunen står for ein tredjedel av finansieringa av reiselivsorganisasjonen, men fylkesdirektøren for næring meiner organisasjonen har feil fokus.
– Det er ein nasjonal strategi som regjeringa legg opp og som ganske sikkert kjem til å medføre endringar i strukturen i destinasjonsselskapa. Dei burde kanskje bruke tida mest på det, seier han.
I Stryn skal saka opp i formannskapet i dag. Men ordførar Sven Flo er klar på kva han meiner om namnestriden.
– Eg er samd med Jan Heggheim, det er ein tullete debatt og den er heilt unødvendig. Vi får eit heilt feil fokus, seier han.
– Må ta vare på alle
Styreleiar i Reisemål Stryn og Nordfjord, Frode Briksdal, seier innhaldet er viktigast, men registrerer meiningane om debatten.
– At det er tullete kan no så vere, men vi må ta vare på alle medlemmane. Er det eit ønskje om å leggje vekk namnet Stryn og Nordfjord og kalle det noko anna, så må ein vurdere det seriøst. Men innhaldet i selskapet må vere heilt konkret og framtidsretta om namnet skal endrast, seier Briksdal.
- LES OGSÅ:
- LES OGSÅ: