I halv tre tida i dag fekk politiet melding om brann langs fylkesveg 42 på Mydland i Eigersund kommune. Det var store mengder skrot langs vegen, som stod i full fyr og gav frå seg giftig røyk.
– Det var masse ulikt skrap som brann. Kjøleskap, treverk, felgar og mykje meir, fortel innsatsleiar i politiet, Jan-Åge Birkeland til NRK.no.
Røyken låg tjukk, men det gjekk greitt for brannvesenet å sløkka brannen.
Brannen var påsett
– Det brann i to forskjellige skraphaugar, så eg forstod fort at brannen var påsett, fortel fagsjef for brann i Eigersund kommune, Per Steinar Berentsen.
Dette er ein stad kommunen lenge har hatt problem med forsøpling langs vegen. Tidlegare låg det ein skraphandlar her, og bilete frå Google-street view of Vegvesenet sitt webkamera dokumenterer at det har vore forsøpla her i fleire år.
Kommunen hadde sendt ut pålegg til ein mann i slutten av 60-åra om å rydda søppelet opp. Det er denne mannen som nå har innrømma at han sette fyr på skrotet.
– Han tenkte at han berre kunne setja fyr på det i staden for å rydda opp, men det er ikkje slik det fungerer, seier Berentsen.
Opprettar sak
Han understrekar at det einaste ein har lov til å setja fyr på i Norge er rein ved, utan å søka om det.
– Dette var alt anna enn rein ved, seier Berentsen.
Nå har politiet gitt mannen pålegg om å rydda opp på branntomta snarast mogleg. Han kan også venta seg fleire følgjer.
– Han er mistenkt for ulovleg brenning av avfall, me har oppretta sak og vil etterforska saka vidare, seier Birkeland i politiet.