– Det luktar sur røyk her og kjellaren ser ganske utbrend ut, seier NRK sin fotograf Rolf Marnburg som er i Sigvad Skaldsveg på Hana i Sandnes.
Det var i kjellarleilegheita i dette huset ein ulmebrann i tretida i natt førte til at ei kvinne på 62 år omkom. Mannen hennar (63) er livstrugande skadd, medan ei kvinne og to barn i etasjen sjølv kom seg ut av huset.
- Les òg:
- Siste nytt om saka
Blussa opp
Etter brannvesenet fekk sløkt brannen reiste dei frå staden, medan politiet heldt vakt.
I åttetida i dag byrja det å osa frå kjellaren, og brannmannskapet måtte ut på ny.
– Det var varmgang i det innvendige taket i kjellaren, opplyser vaktleiar i Brannvesenet Sør-Rogaland, Kjetil Vier.
Brannvesenet har kontroll på varmgangen.
Ein såkalla ulmebrann er ein brann som ikkje får nok luft eller varme til å ta fyr. Sjølv om det ikkje er open flamme kan det koma giftige gassar, som vidare kan føra til kolosforgifting.
Det er politiet i Sandnes som skal etterforska dødsbrannen i natt. Framleis er det verken kjent korleis eller kor brannen i huset i Sandnes starta.
Krimteknikarar må venta
– Sidan brannen blussa opp ventar me med å gå inn. Me kjem oss truleg ikkje inn i huset før i morgon, seier fungerande etterforskingsleiar ved politistasjonen i Sandnes, Sven Arne Oftedal.
Han seier at dei nå gjer avhøyr av naboar. I tillegg jobbar dei med å få varsla alle pårørande i saka.
