Lave forventningar til fredsforhandlingar

Både statsminister i Israel Benjamin Netanyahu og den palestinske leiaren Mahmoud Abbas har sagt seg villege til å gjere kompromiss i samtalane.

Les: Fredssamtaler i Washington

Men 17 år utan fruktbare fredsforsøk gjer at begge går inn mot møtet 2. september utan å stole for mykje på kvarandre, skriv nyheitsbyrået Reuters.

– Mange skjær i sjøen

Netanyahu seier han håpar å kome fram til ein fred, men at han er klar over vanskane.

– Eg veit at det er mange skjær i sjøen, men det grunnleggande spørsmålet er om den palestinske sida er like villeg til å gjere framsteg som den israelske, seier Netanyahu.

Abbas meiner det er Israel som no må gripe sjansen.

– Israel må ta vare på denne historiske sjansen til å få til fred. Om det berre er éin prosent sjanse for å nå dette målet, vil vi kjempe for å nå det.

Les: Ingen forhåpninger til Obama

Tvilar på fred

– Vil denne politiske prosessen føre til fred? Mitt svar er nei, seier rådgjevaren til Abbas, Yasser Abed Rabbo til palestinsk radio.

– Forhandlingane vil bli sunnare med lågare forventningar, seier utanriksm

inisteren i Israel, Avigdor Lieberman.

Den første utfordringa kjem allereie 26. september, når ei 10 månader lang utsetting av israelsk bygging går ut. Abbas har truga med å trekkje seg frå samtalane om bygginga held fram. Netanyahu har sagt at ei ny utsetting ikkje kjem på tale.

– Manglar mandat

Uansett om dei to leiarane blir samde, vil eit stort gjennombrot vere vanskeleg å nå, trur den israelske analytikaren Yossi Alpher.

– Ideologisk har verken Netayahu eller Abbas den naudsynte posisjonen for å nå eit kompromiss, seier Alpher.

I koalisjonsregjeringa som Netanyahu leiar er det fraksjonar som truleg heller vil trekkje seg frå regjeringsarbeidet heller enn å gjere eit kompromiss om Palestina.

– Måtte alle motbydelege folk som Abbas forsvinne frå vår verd, har leiaren av det ultraortodokse partiet Shas, Rabbi Obadia Yosef, sagt i ein seremoni.

Sjefsforhandlar for palestinarane, Saeb Erakat, kalte dette ei oppmoding til folkemord.

– Er det slik den israelske regjeringa førebør folket på fredsavtalen, spør han.

Fryktar Hamas-angrep

Også Abbas har utfordingar. Ifølgje analytikar ved universitetet i Tel Aviv, Mark Heller, manglar han kontroll på kvar tredje person som han skal representere.

Alpher fryktar at Hamas vil prøve å sabotere fredssamtalane med nye angrep frå Gazastripa.

– Ved å opne ein ny front frå Gaza, vil Hamas ha så godt som veto for dei vidare forhandlingane, seier han.

At USA-president Barack Obama deltek i samtalane, blir sett på som positivt for prosessen. Analytikar Mark Heller håpar amerikanaren vil presse hardt på for å nå ei delavtale.

Eitt mål kan vere å bli samde om grensene for ein palestinsk stat og tryggleik for Israel.

– Obama må sikre seg at alternativet til total suksess, som ikkje ser ut til å vere realistisk, ikkje er total fiasko, seier Heller.