Marcelius Eilertsen, Håvard Kveim og Bendik Willoch Berg frå tiande trinn ved den internasjonale skulen i Arendal var suverene og tok 15 av 16 moglege poeng i den første semifinalen.
Henrik Guillaume Varet Jensen, Amez Khasro og Tor Kjetså frå Grim skole fekk flotte 10 poeng, men det heldt ikkje til å nå finalen.
Ved å klikke på videoen under kan du sjå første finalerunde om igjen, og sjå om du klarer å svare på spørsmåla elevane fekk.
Totalt 40 skular har vore i elden i NRK P1 i løpet av hausten og vinteren. Før finaleveka har det vore stilt 480 spørsmål. No er det berre tre skular igjen for å kjempe om gullet i årets Klassequiz.
- LES: Alt om Klassequizen
Dei fire skulane som gjekk vidare til finalerundane er Arendal International School, Grim skole frå Kristiansand, Stuenes skole frå Arendal og Å ungdomsskole frå Lyngdal.
Myte slår sprekker
– Det har vore ein lang turné, men det har vore moro å reise rundt. Hovudinntrykket er at det er flinke elevar. Myten om dei kunnskapslause elevane slår sprekker, seier Klassequiz-general Håvard Raustøl til NRK.no.
Måndag klokka 11.25 gjekk den første semifinalen i studioet på Tangen i Kristiansand, der altså Arendal International School gjekk vidare til finalen.
Onsdag til same tid skal Stuenes skole møte Å ungdomsskole i den andre semifinalen. Torsdag skal vinnarane frå dei to semifinalane møtast i finalen klokka 12.25. Alt blir sendt direkte i Nett-TV og på NRK P1.
Håvard Raustøl lovar at elevane skal få litt å bryne seg på i finalerundane.
Finale på torsdag
– Eg trur vi skal skru til stikka litt. Det er dei fire beste av dei 40 skulane som kjem. Vi må rett og slett yte dei litt motstand, desse super-10.-klassingane. Det er duka for kjempespennande semifinalar og finale på torsdag, seier Raustøl.
Klassequiz-studioet blir fylt opp med elevar som skal heie sine håpefulle fram. I tillegg vil fleire kjende ansikt frå Sørlandet dukke opp i både semifinalane og i finalen.