– Mjelde kan føre Start mot toppen

– Det skulle ikkje forundre meg om Start ganske raskt er med og kjempar med dei aller beste i Norge om seriemeisterskapet, seier Scheie til NRK.no.

• LES: Vil gi Mjelde tid
• LES: Mjelde blir Start-trener

– Eg trur klubben har gjort eit veldig godt val. Han har gode resultat å vise til i Brann. Han er ein fantastisk fyr, som eg er sikker på at alle på Sørlandet kjem til å bli glad i, seier fotballkommentatoren.

Vil gi Mjelde tid

Mons Ivar Mjelde har skrive under ei 4,5 års kontrakt med sørlendingane. Mjelde tek over trenarjobben etter Knut Tørum, som sa opp for kort tid sidan.

– Ut ifrå kontraktslengda verkar det som om Start-leiinga vil gi Mjelde tid til å byggje eit nytt stort Start-lag, seier han.

• LES: Start-trenaren kan få all makt

Administrerande direktør stadfestar at klubben ser fleire år framover med Mjelde ved roret.

– Vi tenkjer langsiktig. Han tek med seg heile familien, og at han kan tenkje langsiktig trur eg er veldig viktig, seier han.

Turbulent tid

Arne Scheie trur også at Start vil spele attraktiv fotball under Mjelde.

– Det er vanskeleg å seie korleis han kjem til å leggje dette opp, men det er jo berre å peike på dei fine åra han hadde i Brann, som til slutt vart krona med seriegull. Eg er sikker på at det kjem til å bli offensiv, attraktiv og morosam fotball å sjå på Sørlandet og elles i landet under Mjelde, seier NRK-kommentatoren.

Etter fleire turbulente år i Start med både hyppige trenaravgangar, internt bråk og store økonomiske problem, trur Scheie at Mjelde kan vere rett mann for å skape stabilitet.

• LES: No er målet å overleve for Start

– Som person er Mons Ivar Mjelde ein veldig fin type. Han er guttas venn, samstundes som han greier å halde avstand. Det såg vi i Brann med mange sterke personlegheiter. Det enda som kjent med gull der, seier han.

Cupfinale

– Eg håpar og trur at dei har landa på eit veldig godt val, ein veldig god trenar for Start. Ein veit jo aldri noko om framtida, men Mjelde har iallefall ein fin ballast og vi få berre ynskje at Mjelde får det ut av Start, som han fortenar, seier Scheie.

• LES: – Start rykkjer ikkje ned

Mjelde si oppgåve blir blant anna å redde plassen. Men Start er framleis med i cupen der dei møter Alta i kvartfinalen. Sørlendingane har aldri før spelt ein cupfinale.

– Vi får jo sjå utover hausten om Mjelde blir den første trenaren som tek Start til ein cupfinale på Ullevaal, seier Scheie.