Minnestund på skuleskipet «Statsraad Lehmkuhl»

I heile Shetland har det blitt flagga på halv stong i dag. Mange ungdommar frå heile verda er nå samla her som mannskap på ulike båtar under Tall Ships Races.

Nyheita om massakren av ungdommar i Norge gjer derfor sterkt inntrykk.

• Les òg: – Like jævlig same kva motivet var

Vil prega arrangementet

– Me står for nett dei verdiane som det kan sjø ut som mordaren på Utøya kjempa mot, brubygging mellom ulike kulturar og personar, seier leiaren for arrangementet i Stavanger Jørn Snorre Andersen.

Han seier at 50 prosent av alt mannskapet på båtane som skal segla frå Waterford i Irland til Halmstad i Sverige er ungdom mellom 15 - 25 år frå ulike nasjonar.

Shetland er siste stoppestad før Stavanger. Det var planlagd ein folkefest under stoppet. Men terroren som har råka landet vil nå setja eit preg på arrangementet.

Vil ha fokus på ungdommane

– Me vil nok tona ned feststemninga, men eg meiner det nå vil bli svært viktig å vektleggja det som går på at dette er ei samling for ungdommar og at me vil byggja bruer mellom ulike kulturar, seier Andersen som skal i møte med ordføraren i Stavanger i morgon kor dei skal drøfta arrangementet.

I Lerwick blei hendinga i dag markert med minnegudsteneste på skuleskipet frå Bergen «Statsraad Lehmkuhl» for alle som hadde behov for det.

Skutene er 24 timar forseinka på grunn av dårleg vêr og vil derfor koma seinare inn til Stavanger enn planlagt.