– Det er kjempemoro, seier dei to nesten i munnen på kvarandre.
Sarah Haugen frå Luster og Gunnhild Vangsnes frå Leikanger har begge vist seg å ha eit stort talent for telemarkkøyring. 16-åringane satsar for fullt på sporten og brukar tid på telemark både på skulen og på fritida.
– Det som er så kjekt med telemark er at du kan trene så variert, seier Gunnhild Vangsnes.
Dei to jentene er i strålande humør når dei får gjere det dei likar best. Til dagen går dei på linja Toppidrett Telemark som er ei ny linje ved Sogndal vidaregåande skule.
- LES OGSÅ:
(Artikkelen held fram under biletet)
Klare for ein hektisk sesong
Denne veka er det haustferie, men for Haugen og Vangsnes er det ikkje snakk om å ligge på latsida. Saman med 60 andre telemarkskøyrarar er dei på samling med Norges Skiforbund i Hintertux i Austerrike.
– Det er kjempebra, eg kosar meg, seier Sarah Haugen og får støtte frå venninna.
– Vi ser veldig fram til sesongen startar, seier Gunnhild Vangsnes.
Dei to jentene går inn i ein hektisk sesong der dei satsar på å få med seg det meste av konkurransar.
– Vi satsar på å delta på både Norgescup, og NM i både fjell- og bakketelemark, seier Vangnes.
Det er fleire unge og lovande utøvarar frå fylket som er i Austerrike for å lade opp til den komande skisesongen. Medan fleire alpinistar trenar i Hintertux, er seks langrennsløparar i Ramsau for å prikke inn forma.