I midten av august vart det kjent at Riksantikvaren gjekk inn med ei mellombels freding av den gamle talkmølla i Framfjorden. Eigaren har bedt om å få rive mølla, og både Vik kommune og Fylkesmannen har gitt klarsignal.
Ifølgje Sogn Avis har dei sveitsiske eigarane jobba med å få på plass rivingsløyve i åtte år. Dei har no klaga på den midlertidige fredinga.
Alexander Ytteborg som er seksjonsleiar for tekniske kulturminner hos Riksantikvaren seier til NRK.no at dei håpar å ha avgjort klagesaka innan nokre få veker. Onsdag var han i Framfjorden for å sjå nærare på talkmølla.
– I forhold til klagesaka er det to moglege utfall. Anten at vi går klager i møte og avfredar, eller at vi oversender klagen til departementet for behandling, seier Ytteborg til NRK.no.
– Hadde ikkje anna val
Då Riksantikvaren for litt over ein månad sidan gjekk inn med ei mellombels freding vart ordføraren i Vik svært letta. Marta Finden Halset fortalde då til NRK.no at kommunen ikkje anna val enn å seie ja til riving, men at ho aller helst vil at talkmølla skal vernast for framtida.
– Utan rivingsløyve hadde mølla blitt ståande til den datt ned, for hadde det ikkje vore eit rivingsløyve hadde det ikkje vore nokon som hadde vore nøydde til å gripe inn med freding, sa Finden Halset til NRK.no i august.
Halset viser til at mølla har høg kulturhistorisk verdi og at anlegget gjennom eksport av talk vart kjent på ein internasjonal marknad. Ordføraren meiner det er svært viktig å ta vare på denne industrihistoria.
- LES OGSÅ:
Ville vinne tid
Alexander Ytteborg i Riksantikvaren seier vedtaket om mellombels freding i hovudsak vart gjort for å vinne tid.
– Det var gjort for å vere sikre på at vi har gjort ei ordentleg vurdering og for å få ro til å gjere ei skikkeleg vernevurdering, seier Ytteborg til NRK.no.
I går var han på plass ved mølla for å sjå nærare på anlegget.
– Vi var der for å få ei oversikt over utfordringar og konfliktflater og andre omsyn som må takast i forhold til klagesaka som eigar har kome med, forklarar Ytterborg.
- LES OGSÅ:
- LES OGSÅ:
Usikkert om mølla blir varig freda
Kor vidt mølla blir varig freda kan ikkje Ytteborg svare på no. Han seier dei først må avgjere klagen på den mellombelse fredinga.
– Vi må ta det første steget no, kva som skjer vidare etter det, det er for tidleg å seie noko om, seier Ytteborg til NRK.no.
Kva vurderingar han gjer i forhold til talkmølla vil han ikkje kome nærare inn på, av omsyn til klagehandsaminga.
– Det er absolutt eit interessant industriminne, men det er vanskeleg å kommentere alle sider av saka når vi no er midt inne i ei klagesak.
Kva det vil koste med varig freding har Riksantikvaren heller ikkje oversikt over. Direktør i Norwegian Talc, Per-Gunnar Leversen, seier til Sogn Avis at det vil krevje formidable beløp for å gjere mølla om til ein turistattraksjon.
Ytteborg seier dei no har bede om meir materiale for å sjølve kunne ta stilling til kva det eventuelt vil koste med ei varig freding.
– Dette er også avhengig av kva ambisjonsnivå ein eventuelt legg seg på, om mølla skal brukast til museum eller anna type verksemd for eksempel, seier Ytteborg til NRK.no.