- Eit minne for livet

– Det blåste heile tida, og regna. Det var vått og surt, seier Kåre Olav Farstad. Han var ein av dei to som sat i vogna som svinga fram og tilbake over Nordfjorden.

– Det var heldigvis mørkt, så det fekk ikkje me med oss, fortel han.

– Plutseleg stopp

I dag møtte dei to pressa etter sitt noko spesielle døgn. Dei to skulle montere flymarkørar på fjordspennet over Nordfjorden, og hadde fått montert ferdig dei som skulle monterast måndag. Så byrja det som har gjort dei to til kjendisar over natta.

– Me har ein motor som me køyrer når me skal utover. Så står det ein kar på bakken med ein vinsj som hjelper oss inn att. Men då var det plutseleg stopp, seier 18 år gamle Espelund.

– Då tenkte eg oi! Me hadde med oss ei naudløysing som me prøvde, men den fungerte ikkje. Så då forstod eg at her blir me verande til nokon kjem og hentar oss, legg kollega Farstad til.

– Ikkje komfortabelt

Då var klokka passert 18 måndag kveld. Og det skulle ta tid før dei kunne setje beina på bakken igjen. Fyrst måtte dei to kome seg gjennom natta på halvannan kvadratmeter .

– Me hadde det ikkje komfortabelt. Me bytta på kven som fekk sitje. Den eine kunne sitje på korgbotnen, medan den andre stod ved sidan av, seier Espelund.

– Føtene somna etter ei lita stund, så det var ikkje lenge me kunne sitje før me måtte opp og strekkje på oss, seier Farstad.

Såg helikopteret gje opp

Dei to måtte sjå redningshelikopteret gjere fleire forsøk på å redde dei ned. Men kabelen dei to hang i var nokre meter lågare enn den andre, og helikopteret kom seg ikkje nær nok til å kunne hjelpe.

Til slutt måtte dei to fire seg ned frå vogna . Slitne vart dei frakta i land , og har fått god hjelp etter opphaldet.

• LES OGSÅ: Rørt tante såg nevøen blei fira ned

Har ikkje teke skrekken

– Eg var aldri redd for å dette ned, for ein veit at kabelen held. Den skal halde det meste, seier Espelund.

No forsikrar han om at han ikkje har teke skrekken. Både han og kollega Farstad skal tilbake, og vil jobbe med liknande fjordspenn også seinare.

– Nei, det var min tur no, så får eg håpe det går betre alle andre gonger, seier Farstad til NRK.

Stor medieomtale

Etter den noko uvanlege overnattinga har dei to vore omtala i mange norske medier, og også i ei engelsk avis. Noko som kanskje gjer det endå enklare for dei å hugse dette.

– Dette er eit minne for livet, seier Espelund.

– Ja, dette hugsar ein, skyt Farstad inn.