Med slagordet Det beste av kortfilm i Sogn og Fjordane, er det snart duka for den sjuande utgåva av filmfestivalen i Sogndal.
Fristen for å melde på filmar går ut 5. mars. Allereie er filmane på veg til festivalarrangørane. Temaet for festivalen er filmskaping.
- LES OGSÅ:
– Vi har snakka med mange som har sendt og skal sende filmar, så mange er på veg. I fjor hadde vi 40 påmelde og eg reknar med at det blir like mange i år, seier festivalsjef Silje Bråstad.
– Blir utfordrande
Festivalen inneheld ein fagdag, workshop og filmvisning. Ikkje minst er det duka for gallakveld og prisutdeling. Bråstad trur den eksterne juryen får mykje å gle seg til når dei skal sjå igjennom alle filmane.
- LES OGSÅ: Filmfestival ynskjer kortfilmen din
– Eg trur det blir mykje bra. Dei skal nok få ei utfordring med å kåre vinnarar i dei ulike kategoriane, meiner ho.
I tillegg skal det også delast ut ein publikumspris.
Prisvinnarar er med
Mellom kandidatane som allereie er komne i arrangørane sine hender, er to unge og talentfulle prisvinnarar. Daniel Volle er ikkje eit ukjent namn for prisutdelarar verken for Q-film eller filmfestivalen i Sogndal. Han har også på gang ein filmproduksjon til 700 000 kroner.
Og lærdølen Bjørnar Hegg Lunde vart i fjor den første frå Sogn og Fjordane som vann Amandusfestivalen på Lillehammer.
– Men prisane er absolutt ikkje delte ut på førehand. Det er heilt sikkert mange flinke filmskaparar som berre ventar på å bli oppdaga, trur Bråstad.
Fortel om Norges dyraste
– I tillegg har vi eigen juniorklasse for barne- og ungdomsskuleelevar og det verkar å vere god interesse blant desse også, legg Bråstad til.
Produsent Aage Aaberge kjem til festivalen 20. mars for å fortelje om innspelinga av den til no dyraste norske spelefilmen – Kon Tiki. Aaberge var ein av produsentane bak filmen med ein prislapp på 93 millionar kroner.
Også tidlegare NRK-reporter Sølve Stang skal medverke under festivalen.