Millionerstatning etter rassikring

Statens vegvesen hadde ikkje med opplysningar om dårleg fjell i anbodgrunnlaget, og må no betale for det.

Mika AS får 5,4 millionar kroner i erstatning etter rassikringsarbeidet i Kjøsnesfjorden i Jølster.

Entreprenøren gjekk rettens veg etter at dei meinte Statens vegvesen betalte dei for lite for sikringa av den rasutsette vegen langs Kjøsnesfjorden.

Kravde 27 millionar kroner

Kravet i Fjordane tingrett var på 27 millionar kroner, pluss moms, for meirarbeid og meirkostnad dårleg bergmasse medførte. Med i kravet var også tilbakebetaling av 4,4 millionar kroner som Statens vegvesen heldt tilbake for sein sluttdokumentasjon, og nær åtte millionar kroner for meirarbeid med rasvollar.

• SJÅ: Biletgalleriet frå opninga av Støylsnestunnelen

Kontrakten mellom partane var opphavleg på 160 millionar kroner.

• LES OGSÅ: Tunnelarbeidet har starta
• LES OGSÅ: Steinane hagla over folk og bilar

Drivinga av den 2,6 kilometer lange tunnelen starta 6. februar 2008. I tillegg skulle det byggjast kring 800 meter veg i dagen, og fem rasvollar.

Feil i grunnlaget

Etter kort tid møtte Mika bergspenningar og sprakfjell frå begge endar under tunneldrivinga.

• SJÅ BILETA: Steinane hagla i Kjøsnesfjorden

Retten gav entreprenøren medhald i at anbodsgrunnlaget inneheldt manglar då den dårlege bergmassen ikkje var omtala. Mika kunne heller ikkje føresjå at fjellet var så dårleg som det var.

Likevel vart erstatningsbeløpet langt mindre enn det Mika kravde fordi retten ikkje fann det bevist og dokumentert at alt meirarbeid og meirkostnad kunne knytast til sprakefjellet.

Rett med dagmulkt

Retten landa på 5,4 millionar kroner i erstatning til Mika, men meinte at Statens vegvesen hadde krav til å halde tilbake dagmulkta då ferdigdokumentasjonen vart levert 88 dagar for seint.

Sidan ingen av partane vann saka i retten, må dei dekkje sine eigne sakskostnader.