Etterforskar eks-rådmann

- Det kan sjå ut som om den tidlegare rådmannen har forfalska dokument, fortel politiadvokat Jørn Lasse Refsnes.

• LES OGSÅ: Dette er Terra-saka

Inn til avhøyr

Det er starta full etterforsking mot den tidlegare rådmannen i Bremanger i samband med Terra-skandalen.

- Toppleiinga i kommunen blir kalla inn til avhøyr like på nyåret, fortel Refsnes.

Kommunen har tapt enorme summar på finansiell gambling, og eks-rådmannen Tor Kristian Gulhaugen er mistenkt for dokumentfalsk.

• LES OGSÅ: Politiet inn i Bremangersaka

Mangla godkjenning

Det er fylkesmannen sin rapport frå 9. november i år, der det kjem fram at Gulhaugen utan politisk godkjenning endra kommunen sitt finansreglement, som gjer at politiet har starta full etterforsking i saka.

- Det er naturleg at vi kallar inn ein del vitner og tidlegare rådmann for å høyre kva han har å seie, seier politiadvokaten.

Endringa av reglementet gjorde det mogleg å foreta mange svært så risikofulle investeringane. Så langt har kommunen tapt 234 millionar kroner på Terra-skandalen.

• LES OGSÅ: Her er dei ansvarlege tre år etter

- Tukla med reglementet

NRK har gjentatte gonger prøvd å få tak i den tidlegare rådmannen, men han har ikkje teke kontakt tilbake.

- Det kan sjå ut som at det er tukla med finansreglementet i Bremanger kommune som er sendt ein meklar i Terra-systemet i høve ein avtale om opsjonar, forklarar Refsnes.

Ordførar Kåre Olav Svarstad er på si side glad for at politiet etterforskar saka.

- Vi kan ikkje leve med påstandar om dokumentfalsk. Vi må få alle fakta på bordet, og det kan politiet hjelpe oss med, seier ordføraren.

Kripos kan bli kopla inn

- Denne endringa i finansreglementet, var det andre i kommunen som var med på dette eller var rådmannen aleine?

- Det er jo det politiet skal finne ut av, og difor kan eg ikkje kommentere det.

Kripos kan bli kopla inn i saka om politiet ønskjer det.

- Dersom vi ser at vi har behov for det vil vi be om hjelp frå dei, seier politiadvokat Refsnes.

• LES OGSÅ: Dei ansvarlege etter Terra sit godt