– Det vil komme mykje nedbør i heile Sogn og Fjordane, seier Erik Holmqvist.
Han er vakthavande hydrolog ved flaumvarslinga på Norges vassdrags- og energidirektorat (NVE). Det er venta store mengder nedbør i Sogn og Fjordane. Difor har NVE no sendt ut flaumvarsel. Nedbøren ventast som regn under 1000 moh.
- LES OGSÅ: Nytt flaumsonekart: Fare for flaum i delar av Årdal kommune
- LES OGSÅ: Så mykje regn har det kome
– Det som skjer er at vi går frå ei periode med veldig mykje fint og kaldt vêr, til ei periode med mykje meir nedbør og mildvêr, seier Holmqvist.
Skapar bekymring
Han fortel at konsekvensane av det kraftige regnvêret vil bli auka vassføring i mange mindre vassdrag og små elvar. Vi vil også få ein god del snøsmelting.
– Det som skapar ekstra bekymring, er at det er is i ein del av vassdraga og avløpsrøyra langs vegane. Difor er kapasiteten til å ta unna ein del av vatnet dårlegare enn den burde ha vore. Det kan føre til lokale overfløymingar og bekkar som tek litt nye vegar, fortel hydrologen.
- LES OGSÅ: Har ikkje regna så mykje sidan 1976
Han seier at situasjonen ikkje er veldig dramatisk, men at vi må vere førebudd på mykje nedbør og våte vegar.
Det er venta mest nedbør frå sundag førmiddag og over mot måndag. Mykje nedbør, kombinert med snøen som ligg, gir også auka fare for sørpeskred.