Millionar av kommunale skattekroner går til fastlegane, sjølv om pasientane blir behandla av eigne sjukeheimslegar.
Brukar ikkje fastlegen
Hans Lønøy (88) bur på Fjell sjukeheim i Hordaland. Han har ikkje vore til fastlegen på lenge, fordi sjukeheimslegen tek seg av behandlinga.
– Eg behøver ikkje gå til fastlegen lenger, seier Lønøy til NRK.
Fastlegar får betalt sjølv om pasientane deira ligg på sjukeheim og får behandling av andre legar. I fjor betalte norske kommunar over 15 millionar kroner til fastlegane for sjukeheimspasientar som framleis står på fastlegelistene.
Laila Dåvøy (KrF) er kritisk til ordninga.
Foto: Håkon Mosvold Larsen / Scanpix– Dei fleste går ikkje til fastlege etter at dei flyttar inn på sjukeheim, seier sjukeheimslegen i Fjell kommune, Tomas Nieber.
Kritikk frå Stortinget
Ein av dei som stiller spørsmålsteikn ved dette systemet er stortingsrepresentant Laila Dåvøy (KrF) frå Hordaland i helse- og omsorgskomiteen på Stortinget.
– Eg syns det er feil. Ein skal ikkje ha betalt for noko ein ikkje gjer. Vi treng kvar einaste krone i helsesektoren, seier Dåvøy.
Fjell-ordførar Eli Årdal Berland (H) er heller ikkje begeistra for dagens ordning.
– Det blir jo både i pose og sekk. Det går jo ut over kommunen sin økonomi, seier Berland.
Forsvarer ordninga
Gunnar Ramstad, leiar i Legeforeningen i Hordaland
Foto: Jørgen Eide / NRKLeiar i Hordaland legeforening Gunnar Ramstad forsvarer ordninga.
Han seier dette er inntekter som trengs for å kunna finansiera drifta av fastlegeordninga. Difor meiner Ramstad at viss dette tilskotet blir fjerna, så må den same summen overførast på andre måtar.
– Desse inntektene er ein del av ei kalkulert kostnadsramme som blei framforhandla på slutten av 90-talet, så det er ikkje noko rart i det. Det blei avtalt å gjera det på denne måten for å gjera finansieringa minst mogleg byråkratisk, seier Ramstad.
Den norske legeforening forsvarer ordninga i ei pressemelding dei sende ut i dag.
– Då fastlegeordninga blei innført tok ein høgde for at det er eit antall pasientar som er på sjukeheim, i fengsel og andre stader der fastlegen ikkje har ansvar for dei, opplyser legeforeininga.
Les og: | | | | |