Veterinærane vil leggje ned næringa

Etter at Mattilsynet friskmeldte næringa i vår, avslørte organisasjonen Nettverk for dyrs frihet førre veke fleire tilfelle av grov dyremishandling hjå pelsfarmar i Rogaland.

Les også: Tok skrekk-bilder på pelsdyrfarm

Kritikkverdige forhold hos pelsfarmer i Rogaland

Sjå biletgalleri: Skadde dyr på pelsdyrfarm (Vi åtvarar mot sterke bilete).

Reaksjonane har ikkje lete vente på seg. Måndag denne veka gjekk Venstre-leiar Lars Sponheim næringa i strupen og meinte næringa burde avviklast om det ikkje skjer radikale endringar.

- Dei har fått lov å drive næringa så sant denne kan drivast forsvarleg. I dag gjer dei ikkje det, og dyra har det ikkje godt nok, sa han.

No går også Veterinærforeininga inn for å leggje ned næringa.

Kommenter artikkelen nedst.

- Framleis store problem

Årsaka er at næringa i dag er basert på hald av aktive rovdyr i små nettingbur, skriv Veterinærforeininga i ei pressemelding.

- Driftsforma betyr at dyra ikkje får tilfredsstilt naturlege åtferdsbehov. Trass i gode intensjonar i næringa, syner det seg at det framleis er store problem med tanke på dyrevelferd, melder foreininga.

- Det å halde små aktive rovdyr i nettingbur kan ikkje sameinast med god dyrevelferd. Dette er streifdyr. Når vi held dei i bur heile livet gjennom byr det på store dyrevelferdsmessige utfordringar, seier president Marie Modal i Veterinærforeininga.

Veterinærforeininga har også tidlegare uttrykt skepsis til pelsdyrhald.

- Vi har kontroll

Også miljøpartiet de Grønne vil leggje ned pelsnæringa, og har bede om ei gransking av Mattilsynet.

Mattilsynet på si side meiner dei har god kontroll på kva som går føre seg hjå norske pelsfarmar.

- Eg vil seie vi har god kontroll på denne næringa. Også i forhold til det regelverket vi har, som mange nok er usamde i, kjenner eg vi har god kontroll, sa tilsynsdirektør Kristina Landsverk i Mattilsynet til NRK i helga.

- Panikkarta

Sølvrevoppdrettar Hans Dagrød reagerer svært sterkt på framlegget om å leggje ned heile pelsdyrnæringa i landet, og meiner dette er å straffe ei heil næring for feil nokre oppdrettarar gjer.

- Vi vil dessverre finne enkelte som aldri ordnar med dyra sine slik dei skal, men det kan ikkje alle vi andre verte straffa for, meiner Dagrød.

Les også: - Panikkartet om pelsdyr