Rock-joavku SomBy lea čuojahan ovttas 2007 rájes. Sin vuosttaš skearru Čáhppes Lasttat almmuhuvvui 2008:s, ja 2009:s vuite sii Sámi Grand Prix. Álás Eana skearru almmuhuvvui 2010:s, ja dán jagi gárvana fas ođđa skearru dán sámi joavkkus.

Ođđa skearru gárvvis

Keyboard-čuojaheaddji Milla Pulska muitala ahte sii leat ieža ráhkadan musihkkavideo "Where the f*ck is Vuotso" lávlagii. Video lea duddjojuvvon Raahes Suomas ovtta studios.

Lei go ollu bargu?

– Na veahá gal lei, muhto manai bures. Olles joavku lei mielde, ja lei hirbmat suohtas čuojahit ovttas, muitala Pulska.

Earát SomBy joavkkus leat vokalista Miira Suomi, gitárračuojaheaddji Oula Guttorm, bássačuojaheaddji Juho Kiviniemi ja rumbočuojaheaddji Unna-Maari Pulska, Milla oabbá. Joavku áigu čuojahit moadde konseartta dán gease, earret eará Roavvanjárggas Suomas.

Goas beassat mii guldalit Somby ođđa skearru?

– Mii almmuhat ođđa skearru dán čavčča. Dat lea jo gárvvis, mii fertet dušše almmuhit dan. Ja čakča lea min mielas buorre áigi dan dahkat. Skearrualmmuheami oktavuođas vuolgit mii maiddái smávva čuojahanmátkái dahjege turneai, illuda Pulska.

Dás beasat geahččat "Where the f*ck is Vuotso" musihkkavideo.