Aftenposten musihkkajournalista Robert Hoftun Gjestad muitala NRK:i ahte orru leamen nu ahte olbmot eai mana konsertii, muhto festii.

– Olbmuid mielas orru leamen suohttasat gullat maid skihpárat leat bargan dan sadjái go musihka guldalit, muitala Robert.

Váttis čuojahit

Mii leat jearran muhtin Norgga ja Sámi artisttain ahte muosehuhttet go konseartaáiggi olbmot geat ridjet ja hállet.

Okta dáin artisttain lea Egil Hegeberg gii lea dovddus máŋgga iešguđetge joavkkus Norggas.

– Mun vásihan ahte dat čuohcá munnje. Dat váikkuha munnje dan láhkai ahte in nagot álo čuojahit nu go gálggašin, muitala Egil.

Klemet Anders Buljo lea leamašan miehtá máilmmi čuojaheamen.

– In vásit dán váttisvuođa eará sajiin go Norggas, lea hui heahpat go geahččit hállet ja šurret konsearttain, dadjá Klemet NRK:i.

Son muitala ahte ii álo dagat riedja váttisvuođa. Muhto jus eai leat nu ollu instrumeanttat maid geavaha ja detáljat musihkas leat dehálaččat, de lea hui muosehuhtti go olbmot hállet, go dalle gullo šuvva lávddi alde.

• Loga maiddái: Norske artister har sett seg lei på bråkete publikum

Klemet Anders Buljo muitala ahte son dovdá artisttaid geat eai oba gillege vuolgit čuojahit diekkár sajiide gos dihtet ahte olbmot hállet olu. Šuvva oainnat dahká váttisin čuojahit ja muosehuhttá olu.

Juoga ferte dahkkot

Dán lea Rockefeller, Oslos, smiehttan. Sii lea maid vásihan ahte olbmot hállet hirbmat olu konsearttain.

– Mii leat seaidnái heŋgon njuolggadusaid mo galgá láhttet konsearttas. Ammal dát veahkeha, dadjá Buljo.

Rockefeller lea maid bidjan bevddiide koarttaid, main čužžot njuolggadusat. Jus doppe lea okta gii hállá konsearttas, de sáhttá geiget dan olbmui koartta, mas bivdojuvvo orrut riejakeahttá.

Šerpet

Nils Heldal oaivvilda ahte ii leat gehččiin mihkkege boasttuvuođaid go háleštit konsearttain, muhto baicce artisttain.

– Mun háliidan oaidnit eanet dovdduid ja rieja. Jus olbmot hállet konsearttas, de sáhttá árvvoštallat nu ahte ii leat gehččiin mihkkege sivaid, muhto artisttain. Go hállojuvvo olu, de ii leat doarvái miellagiddevaš dat, mii dáhpáhuvvá lávddi alde, dadjá Heldal.

• Guldal: