Soai leigga vieljain meahcis muhtin dálkebeaivvi iige lean maid bargá. De fuobmái Gárasavvon bárdni Ber-Joná Labba juoga suohttasa áigegollun.

Vuollelis áššis oainnát makkár filbma šattai!

Labba filbmii vieljas go borai márffi. Filbma šattai dan muttos suohtas ahte almmuhii Facebookai dan. Dát lei ovdal Instagrama áiggi. Maŋŋel de álggii ge Instagramai almmuhit filmmažiid. Olbmot sihte su eambbo filmmaid ráhkadit, nu son dagai dan.

• Loga maid: Iskka Facebooka ovdalgo ráhkkástalat

Árgabeaivvi eallimis oažžu inspirašuvnna

26 jahkásaš oažžu inspirašuvnna filmmaide árgabeaivvi eallimis, iežas vásáhusain ja fearániin maid lea gullan. Olbmáin lávejit maid leahkit idéat ja nu sii lávejit de hutkat.

Ber-Joná neaktá ieš, ja sus leat vieljat veahkkin filbmeme. Son muitala ahte maŋemus filmmas maid almmuhii, de lei su unnavieljaš gii lea 10-jahkásaš gii filbmii.

Amas olbmot bohtet hupmat

Lagabui 600:s čuvvot Ber-Joná siiddu Instagramas. Ieš dattetge jáhkká eambbosiid filmmaid geahččat.

– Go láven leahkit Gironis, dahje sámi doaluin, de lávejit olbmot boahtit ja hupmat mu filmmaid birra. Maiddái olbmot geaid in leat goassege ovdal oaidnán. Jáhkán ahte leat olusat geat eai čuovo mu Instagramas geat maid gehččet filmmaid.

Vaikko leat dán muttos olusat geat filmmaid gehččet, de Ber-Joná ii dovdda gal iežas beakkálmassan.

– In mun dovdda beakkálmassan iežan. Veahá gal dovdo go amas olbmot bohtet hupmat. Muhto ii muđui gal. In liika bajás ja jurddaš ahte lean beakkálmas, boagusta Ber-Joná.

Oažžut olbmuid boagustit

Su mielas lea somá go olbmot liikojit su filmmaide. Go jearrat mii ulbmil lea filmmaiguin, de muitala ahte ii sus leat gal eará ulbmil go oažžut earáid boagustit. Soaitá vel nu maid ahte jus muhttimis lea heajos beaivi, ja de geahččá suohtas filmma maid lea ráhkadan, de soaitá dát dagahit ahte sis šaddá buoret beaivi, joatká Ber-Joná.

130:s leat "liikon" filmma

Vahku maŋŋel go NRK finai Ber-Joná guossis, de riŋgiimet sutnje jearrat lea go son duđavaš filmmain maid ráhkadeimmet. Dan son gal lei.

130 olbmo leat deaddalan "liikon" filbmii. Son ii lean na oallugiid vuordán liikot filbmii. Dát filbma lea ge de goalmmádin eanemus likesaid ožžon su filmmain.