– Eg er alltid medviten på at noko kan skje. Det er rutinar ein har i ryggmarken til ei kvar tid, seier områdeleiar i NOKAS, Haakon Skogan Bore.
Hans jobb er å passe på Universitet i Bergen. Vanlegvis ikkje ein jobb nokon ville tenke på som farleg.
Men få kvartal frå hans daglege arbeidsplass blei ein kollega knivstukken tidleg i går.
Fleire hundre episodar i året
– Slike hendingar gjer at eg blir ekstra obs på ting som kan vere trugande og potensielt farleg i arbeidskvardagen. Det er jo også derfor vi er her, for å handtere situasjonar som kan vere ubehagelege, seier Skogan Bore.
Knivstikkinga i Bergen er ikkje unik.
I fjor var det 318 episodar med vald eller trugslar mot ein vektar på arbeid i Noreg. Det syner ei kartlegging NHO har gjennomført.
– Meir vald enn før
– Det er oftare valdshendingar enn før, og valden mot vektarane er til dels også grovare enn før, fortel fagsjef for tryggleiksbransjen i NHO, Runar Karlsen.
No kjem det nye opplæringskrav for vektarar, og NHO vil ha snerkar vern i lovverket for yrkesgruppa.
– Utøver du vald mot ein vektar i teneste skal du straffast hardare enn du ville blitt elles. På lik line som om vil du få strengare straff om du er valdeleg mot ein konduktør i NSB som er i teneste, meiner Karlsen og NHO.
Støttar NHO-kravet
Skogan Bore har også opplevd farlege situasjonar på jobben, og støttar ønskje om eit betre vern av vektarane.
– Når det kan hende uønskte episodar, er det godt å vite i bakhovudet at ein får god oppfølging frå rettsstellet.
- LES OGSÅ: