Det innrømmer byrådsleiar Ragnhild Stolt-Nielsen. Ein gjennomgang NRK har gjort viser at ei rekke planar på kultur- idrett og næringsområdet er kraftig forseinka.
Ruth Brudvik frå Ap har i fleire år etterlyst ein oppdatert idrettsplan.
– At byrådet ikkje kjem med ein idrettsplan er å halde dei som arbeider frivillig for narr, seier Brudvik.
«Et steg foran» heitte idrettsplanen bystyret i Bergen vedtok i 2009. Ein føresetnad var at planen skulle oppdaterast før 2013. No er byrådet fleire steg på etterskot.
– Dei seier dei skal gjere det, men det blir rett og slett ikkje gjort. Byrådet tek ikkje ansvaret sitt på alvor, seier Brudvik.
Avtroppande byråd Gunnar Bakke skriv i ein SMS til NRK at han ikkje vil kommentera eit politikkområde han ikkje lenger har ansvar for.
Leiar i kulturkomiteen og gruppeleiar for Frp, Tor Woldseth ønska ikkje å kommentera saka til NRK i går.
Har brukt for lang tid
Det er ikkje berre idrettsplanen som har vorte liggande på bordet til kulturbyråden:
- Sentrumsplanen skulle vore ferdig våren 2013.
- Landbruksplanen som skulle gjelda frå 2012 har ingen sett noko til.
- Ein plan over bassengstrukturen i bydelane vart lova i fjor sommar men er ikkje lagt fram.
- I tillegg gjekk kulturstrategien for kulturbyen Bergen ut på dato i 2012 – utan at bystyret har fått nokon ny strategi på bordet.
– Eg tykkjer ikkje det er rett å kommentere innsatsen til ein byråd som har gått av. Men planetterslepet viser jo utfordringane den nye kulturbyråden vil få, seier byrådsleiar og fungerande kulturbyråd Ragnhild Stolt-Nielsen.
Ho vedgår at byrådet har brukt for lang tid på fleire av planane.
– Det er heilt klart ikkje bra at planar ikkje blir levert når dei skal.
– Reine maktarrogansen
Nestleiar i komite for kultur, idrett og næring Oddny Miljeteig frå SV meiner heile byrådet har ansvaret.
– Høgre og Frp hersar alltid med andre parti og kritiserer oss for å mangle handlekraft. Er det reine maktarrogansen eller får dei det berre ikkje får det til? Det skal ikkje eg seie, men det verkar som om dei ikkje har styring.