Fire skular og fleire barnehagar har vore stengde på Lindås måndag, grunna straumbrot etter ekstremværet «Nina». Det gjorde at Nils Frøseth var heime med dei yngste barna.
– Det er fredeleg og roleg. Du merkar først no at du kan kose deg utan avbrytingar. Det er ingen telefonar som ringjer, og ingen datamaskin, seier han.
– Du får ikkje jobba, og du får ikkje gjort noko anna enn å vente på at straumen skal kome attende.
- LES OGSÅ:
– Me kosar oss
Med god peisvarme i huset er konsekvensen av «Nina» ikkje så ille for familien Frøseth likevel, meiner far i huset.
– Me får tid til å kose oss. Me tar fram brettspela, les bøker, slappar av, og pratar. Me gjer alt som ikkje er data- og TV-relatert, og det er også koseleg, seier Nils Frøseth.
Medan far i huset planlegg ein enkel middag på stormkjøkkenet, får ungane i huset tid til kvarandre.
– Når du har straum legg du ikkje merke til at det er veldig mange lydar. Du høyrer forskjellen først når straumen forsvinn, seier ni år gamle Amanda Frøseth Hindenes.
- LES OGSÅ:
- LES OGSÅ:
– Du høyrer kva andre seier
Med svarte skjermar, utan Internett, og utan mogelegheit til å spele TV-spel, så er eit besøk frå fetter Morten Hindenes godt selskap for barna i huset.
– Det er ikkje heilt som i gamle dagar, men det er ganske greitt når me ikkje har nokon skjerm å sitte med. Du høyrer kva dei rundt deg seier, fortel 11 år gamle Morten Hindenes.
– Når straumen kjem attende gler eg meg til å få varm mat, for det har det vore lite av medan straumen har vore vekke, seier han.
Måndag kveld har mange fått straumen attende, og Lindås kommune melder om at om lag 300 husstandar i kommunen går mot ei tredje natt utan straum.
Skulane på Leiknes, Skodvin, Myking og Kløvheim har fått attende straumen, og opnar som normalt i morgon, tysdag 13. januar.
- LES OGSÅ: