Martin (24) håpar historia frå 2007 gjentek seg

Som benkeslitar med Førde, vart hallingdølen både nordisk og norsk meister i volleyball.

I Tromsø er Martin Støyten meir eller mindre fast inventar på laget, og klubbens største poengsankar i eliteserien.

Laurdag håpar han å kunne heve kongepokalen for andre gong – då på kostnad av gamleklubben.

– Det hadde vore truleg moro om historia frå 2007 gjentek seg. Då var Tromsø som var favorittar og Førde underdogs. No er det omvendt, seier 24-åringen.

– Cup er cup

Medan sunnfjordingane reiste mot Oslo i 11-tida fredag , har Tromsø-spelarane vore i tigerstaden sidan torsdag. Diagonalspelaren med ei rekkevidd på 339 centimeter, vedgår at det er favoritten som er på veg mot hovudstaden.

(Artikkelen held fram under biletet)

– Førde er favoritt, både på grunn av tidlegare resultat og det at dei har gjort det bra siste åra. Dei har utvikla veldig mange gode spelarar og har som oss eit ungt lag, seier han og held fram:

Aksepterer stempelet

– Dei slo oss 3–0 sist, men vi har håp om å spele ein veldig god kamp og kunne matche Førde. Det er aldri godt å vite kva som skjer i ein cupfinale. Det er som i fotball; cup er cup, legg Støyten til.

I Førde-miljøet aksepterer dei favorittstempelet.

– Viktigaste no er å ikkje undervurdere Tromsø og at ein er skjerpa. Kjernen for heile spelet er servepress og å få mottaka til å sitje, seier mangeårig eldsjel Jan Ove Hafstad.

– Vi kan ikkje gå inn i kampen og tru at vi er mykje betre enn Tromsø. Då går det gale, legg Simon Buvarp til.

Åtte kongepokalar

Tromsø har åtte cupmeisterskap i cupen. Av desse kom fem på rappen tidleg på 80-talet. 2006 var sist gong spelarane frå Nordens Paris heva kongepokalen. Etter det smertelege nederlaget for ferskingane Førde i 2007, har ikkje Tromsø vore representert i ein cupfinale.

For sidan har det stort sett vore Førde og Nyborg det har handla om. Sjølv om han har møtt gamleklubben fleire gonger i serien, vedgår Støyten at det blir spesielt å møte Førde i ein cupfinale.

– Det er alltid moro å spele mot Førde, men det blir ei heilt anna ramme og ein del meir publikum rundt ein cupfinale. Og spesielt når ein har gamle lagkameratar på andre sida av nettet, seier han.

Gode minne frå Førde

– Sjølv om det har vore ein del utskiftingar, så kjenner eg ein del av spelarane og støtteapparatet, legg Støyten til. Og fortel om gode minner frå tida i Førde, der han også gjekk på folkehøgskule.

No studerer 24-åringen for tredje året i Tromsø.

– Eg følte eg vart veldig, veldig godt teken i mot av spelarar, trenarar og miljøet i Førde. Det var ei tid med mange gode resultat, seier han og vedgår at sjansen for speletid vart større etter at han reiste nordover.

Vil ikkje spå

Tromsø har kome sterkt utover sesongen i år, og har levert fleire sterke resultat siste tida.

– Vi fekk ein ny midtspelar denne sesongen, og har fått ei kjerne i laget som har trena saman over ein lengre periode, seier Støyten. Det gjer at Tromsø både håpar og trur at dei kan hamle opp med Førde. Og at sunnfjordingane ikkje tek sigeren på forskot.

– Om du skal tippe utfallet av finalen?

– Det tør eg ikkje. Dersom det blir ein kamp som går over fem sett, så trur eg det blir ein bra kamp uansett. Eg satsar på ein jamn og god kamp.