Ferjefolk fekk smakebit av teaterstykket "Kjærleikens ferjereise"

– God dag, eg kjem frå Sogn og Fjordane teater og kan eg få by deg på ein smakebit frå vår storsatsing i haust, teaterstykket Kjærleikens ferjereise? Spørsmålet kjem frå Kjell Mjelleli som er marknadsrådgjevar i Sogn og Fjordane teater.

I dag har han tatt arbeidsdagen eit steg lenger enn vanleg. Han går målretta går mot kvar einaste bil på Fodnes ferjekai for å promotere haustens storsatsing – Kjærleikens ferjereise. Det er ei musikaloppsetting skrive av Edvard Hoem.

(Saka held fram under biletet)

– Her på ferjekaia kjem ein ekstra tett på marknaden og publikum. Så dette er kjekt og interessant jobb å vere med på!

Ekte smakebit

For å få dei reisande til å "bite på" promoterinsstuntet har Mjelleli med seg klassisk ferjemat – svele. I tillegg byr han dei reisande på knasande raude eple frå Sogn. Og litt kaffi i koppen.

– Eg såg de skulle komme til Sogndal. Så du ser meg der, seier ei av dei reisande i ferjekø.

Mjelleli meiner teaterstykket er ein slager. Romanen er skrive av Edvard Hoem og kom for første gong ut i 1974. Då vart boka innstilt til Nordisk Råds litteraturpris.

(Saka held fram under biletet)

– Mange hugsar boka godt og når eg byrjar å snakke om den blir det kveikt ein loge i dei, humrar Mjelleli.

Byr på seg sjølv

Men marknadssjefen er ikkje den einaste som er på ferjekaia for å "fri" til potensielle publikummarar. Ein av skodespelarane er iført tidsrett antrekk for skodespelet, med blå slengbukse, gule gummistøvlar og skjorte med breie snippar.

– Eg har tatt på meg 70-talet og her står eg og byr på meg sjølv. Håret har eg latt vekse for å vere heilt i tida. Det er ikkje nokon som køyrer forbi her utan å legge merke til meg, humrar skodespelar Fredrik Høstaker.

Han skal vere med i oppsetjinga til Sogn og Fjordane teater. Han har rolla som Hans Kristiansson.

• LES OGSÅ: Sprang fylket rundt for å promotere teaterstykke - men berre 1060 tok turen...
  
• LES OGSÅ: Desse to inviterer til den første teaterfestivalen i Sogn og Fjordane - i Fjaler

Ekte dritsekk

– Han er ein sjarmør og dritsekk. Han tenkjer berre her og no, og tar kanskje ikkje dei smartaste vala. Men det er ei spennande rolle. Dette er ei rolle veldig langt frå meg sjølv, får eg håpe, ler den unge skodespelaren i 20-åra.

(Saka held fram under biletet)

Det er første gong han spelar eit teaterstykke i regi av Sogn og Fjordane teater. Men på Fodnes ferjekai trivst Høstaker godt.

– Det følest veldig rett å stå på ei ferjekai. Ferje er jo eit vestlandssymbol. Så det ligg hjartet mitt nær.