SV hardt ut mot sentralisering

Det var i talen sin på fylkesårsmøtet i Sogndal tidlegare i dag at fylkesleiar Vibeke Johnsen tok eit oppgjer med den sterke sentraliseringa frå dei blå partia.

– "Robust" er eit ord som trumfar det mest for tida. Sogn og Fjordane scorar framleis høgt på faktorar der eit godt liv i eit godt samfunn tilseier at høg score er bra. Men dette blir det knapt snakka om i utgreiingar og reformer. Det er på tide å snakke høgt, tydeleg og varmt om eit godt liv for folk flest. Og det er på tide å snakke sentralistane i Oslo imot, sa Johnsen til applaus frå fylkesårsmøtet.

• Les også: Det store sentraliseringsåret 2015
• Les også: Trur Lærdals-brannen kan stoppe sentralisering av naudetatane

Skammekroken

I ein resolusjon som etter alt å døme kjem til å bli vedteken på fylkesårsmøtet i morgon heiter det mellom anna:

«Regjeringa har langt på veg lukkast med strategien sin når det gjeld dei såkalla robuste einingane. Dei har fått diskusjonen til å dreie seg om kven ein skulle slå seg saman med. Dei som ikkje trur på større einingar blir sett i skammekroken. Ei rad offentlege institusjonar som kommunane, politiet, høgskulane, kriseberedskapen blir bedne om å finne ut korleis dei kan vere mest mogleg effektive. Samtidig finst det ingen analyse av kva som vil skje når desse organa blir sentraliserte».

– Skyt seg sjølve i foten

Frank Willy Djuvik, fylkesleiar i Frp, tykkjer utspela frå SV er merkelege.

– Stort sett alle prosessane vi ser i dag vart sett i gong under den raudgrøne regjeringa, som SV var ein del av. Det blir nesten som å skyte seg sjølv i foten det SV driv på med seier han.

Samstundes vedgår han at han som politikar er oppteken av å bruke skattebetalarane sine pengar på ein effektiv måte, med minst mogleg byråkrati og administrasjon.

– Det er nettopp difor eg er glad for at Høgre og Frp sit i regjering når desse reformane skal gjennomførast, for vi har klart å snu det som i utgangspunktet var sentraliseringsformar, om til kvalitetsreformar for å sikre tenestane til innbyggjarane våre, seier han.

• Les også: «Desentralisering av naudetatane fungerer»
• Les også: Justisministeren må svare om politireform

Johnsen held fram

Årsmøtedelegatane hadde også ei markering mot sentraliseringa på eitt av kjøpesentera i Sogndal tidlegare i dag. Det vart halde appellar og delt ut løpesetlar.

Vibeke Johnsen blir i morgon etter alt å døme attvald som fylkesleiar. Eldrid Skudal tek attval som nestleiar. Steinar Øydvin er innstilt til å ta over det andre nestleiarvervet. Jakob Andre Sandal går av som nestleiar.