Strålande vêr og stor brannfare

Påsken har starta med strålande vêr. Sola har strålt frå ein skyfri himmel i heile Sogn og Fjordane, og vêrmeldingane resten av påsken er også omtrent ei einaste stor sol.

Men dei siste vekene har det også vore mange bråtebrannar som kjem ut av kontroll, seinast søndag føremiddag i Hyllestad.

• LES OGSÅ: Ny bråtebrann ute av kontroll
• LES OGSÅ: Måtte rykke ut til to grasbrannar

– Eg vil anbefala at folk ikkje brenn bråte, det er ikkje nokon endring i vêret so den høge brannfaren er uforandra, seier Tone Christin Thaule, meteorolog ved Meteorologisk institutt i Bergen.

– Det er heller ikkje venta noko nedbør, so det blir tørt framover.

• LES OGSÅ: Blir melde etter bråtebrannar

(Artikkelen held fram under videoen)

Også alarmsentralen i Sogn og Fjordane åtvarar mot å brenna vekk daudt gras denne veka.

– Det er ekstremt tørt ute no, so folk må vera forsiktige. Det skal ingenting til før det kan gå skikkeleg gale, seier vaktleiar Jan Gunnar Holvik ved Alarmsentralen, som åtvara folk mot å brenna bråte.

• LES OGSÅ: Har rykt ut til fire bråtebrannar

Sol, sol og meir sol

• Her finn du vêrmeldinga for der du er

Det blir uforandra vêr fram til tysdag, men onsdag kan du kanskje leggje vekk solbrillene.

– Onsdag vert det truleg litt meir skya, spesielt i nordlege deler av fylket, men det blir truleg ikkje noko nedbør, seier Thaule.

Men allereie torsdag kan du ta fram att solbrillene, og då kan du ha dei på resten av påsken.

– Frå torsdag av klårnar det opp att. Det blir nord- og nordvestlege vindar som dominerer, og det er ein god retning for Sogn og Fjordane.

– Veit de kor tid finvêret tek slutt?

– Nei, so langt fram prognosane våre går, so ser me ingen ende på det fine vêret!

(Artikkelen held fram under biletet)

Kald påske

Med klårvêr kjem også kuldegradene. Sola varmar godt om dagane, men der solstrålane ikkje når blir det kald.

– Sola tek ganske godt på dagtid, men det blir ein stor forskjell på natt og dag. På dagtid kan ein få ein til tre plussgrader i skuggen i låglandet, men i høgda vil nok minusgradene dominera endå. Nettene blir kalde, spesielt i indre strøk, seier Thaule.

– Heldigvis er det lite vind, so om du finn deg ein lun krok so kan det kjennast ganske behageleg i sola, seier ho.