I fleire døgn har fleire hundre brannfolk og innsatspersonell kjempa mot flammane på Sotra i Øygarden.
– Heilt perfekte vind- og vêrforhold for ein gras- og lyngbrann, uttalte brannvesenet like før brannen eskalerte tidleg torsdag kveld.
Det skulle bli ein av dei verste gras- og lyngbrannane som har herja i dette området. Også no laurdag er meir enn 30 mannskap i innsats i terrenget.
Det heile skjedde nord på Sotra i Øygarden kommune.
I dette området ved Fjæreidvegen starta brannen like før klokka 12 torsdag.
Brannen spreidde seg langs sjøen mot Spjeldsfjellet.
Så dreidde brannen nordvest mot Ågotnes.
I 15.30-tida gjekk brannen vestover mot Sekkingstad og Kårtveit.
Brannvesenet sleit med å få kontroll. Helikoptera såg knapt flammane gjennom røyken.
Klokka 18.15 tok det fyr i eit hus på Kårtveit. Fleire hus stod i fare.
Klokka 18.45 spreidde flammane seg til eit hus til.
I 20-tida var huset heilt nedbrent. To familiar stod utan husvære.
Etter at bustadhuset har brent ned til grunnen, spreier brannen seg vidare mot Ågotnes. Via Twitter varslar politiet over 4000 innbyggarar om at dei må gjera seg klare for å bli evakuerte.
– Vi er ikkje i nærleiken av å ha kontroll. Det er ein krevjande innsats og tørt i terrenget, sa Bjørn Olav Paulsen, brann- og redningssjef i Øygarden kort tid etterpå.
Til slutt må over 500 personar forlata heimane sine. Fleire får høyra at sjansen er 50–50 for at husa deira kan bli redda.
Medan hundrevis registrerer seg i den lokale idrettshallen ser det slik ut ute i terrenget.
Gjennom natta kjempar mannskap frå brannvesen og sivilforsvar mot oppblussinga av småbrannar her og der.
At vinden har roa seg, hjelper godt.
Fredag føremiddag tok vinden seg opp att. Brannvesenet var bekymra.
Og slitne.
Små, nesten usynlege glør som i denne svartbrente mosen, ligg som tikkande bomber i terrenget.
Det blussa opp småbrannar både nordvest og i aust.
På føremiddagen drog politiet tilbake der brannen starta.
Krimteknikarar undersøkte staden. Politiet skal avhøyre vitne i området for å finne brannårsaka.
På ettermiddagen roa brannen seg og evakuerte fekk flytte heimatt. Men det kan ta dagar å sløkke alt.
Tilbake står dei som har mista alt dei eig. Familien Kårtveit skulle feira bursdag. Huset var nyvaska og flagget var heist. Så slukte flammane huset fullstendig.
– Eg hylgrein. Eg var rett og slett i sjokk. Eg visste ikkje kva eg skulle gjera
Slik ser den tidlegara heimen hennar ut etter brannherjingane.
Politiet har fått inn fleire tips etter at dei fredag starta undersøkingssak.
Natt til laurdag blussar det framleis opp småbrannar i terrenget på Sotra. Brannvesenet trur det går mange dagar før dei endeleg får sløkt storbrannen.