Etter at seriemeisterskapen og opprykket i 3. divisjon avdeling 8 var feira laurdag kveld, tok spelarane i Førde Fotball bokstaveleg talt grep om feiringa.
- LES OGSÅ:
Bilen til trenaren vart plassert inneklemt mellom trappa og eit gjerde ved klubbhuset, skriv Firda. Då Knut Erik Folland kom på jobb måndag, var han budd på tunge tak.
– Eg kunne ikkje gjort det noko betre sjølv. Eg har veldig lite kunnskap om bil generelt, og i alle fall ikkje på løfting av bil. Det har eg ikkje hatt erfaring med, men eg må truleg ha hjelp, humra trenaren til NRK.no.
Fiaskopris i 2008
Kaptein Øystein Vetti fortel at ideen dukka opp då spelargruppa kom attende frå feiringa på Sunnfjord hotell.
(Artikkelen held fram under biletet)
Ole Henrik Gulliksen, som i 2008 gav heile laget årets
mot Åskollen, var mannen bak ideen. Også bilen til administrativ leiar i Førde Fotball, Jo Inge Gåsvær, vart vurdert.– Men den var litt nyare og finare. Knut Erik har rakka slik ned på den gamle postbilen sin og har tidlegare fortalt at han har vore med på tilsvarande som ung, ler Vetti.
Ville velte bilen
Vetti fortel at aksjonen tok 10–15 minuttar, og at dei til ei kvar tid var 10–12 spelarar kring den 11 år gamle Renault Kangoo Express.
Den 1080 kilo tunge bilen vart flytta fem-seks meter, og skvisa inn mellom trappa og gjerdet ved klubbhuset. Tidlegare Frankrike-proff Alexander Ødegaard føreslo å velte bilen, noko spelargruppa stemte ned.
– Heile spelargruppa stilte seg bak dette. Vi byrja med fronten først, fekk den på plass, og så fekk vi vridd inn bakenden. Vi hadde ein del andre idear, men eg er glad vi ikkje gjennomførde dei. Nokre vil vi spare til seinare høve, gliser kapteinen.
Invitert til dugnad
– De fryktar ikkje straff frå trenaren?
– Hehe ... No var vi heile stallen samla bak dette, så blir det noko kollektiv straff, så skal vi ta den, humrar Vetti.
Trenar Folland tek det heile med eit smil, og har ingen planer om verken benketilvære eller straffetrening for nokon av disiplane sine.
– På ingen måte. På ingen måte. Det er ein gammal bil og er snart ferdig likevel, flirer han.
– Eg skjønar ikkje korleis dei har fått det til eg. Veldig bra, held han fram.
Måndag morgon fekk spelarane invitasjon til dugnadsarbeid ved klubbhuset. Kva som låg i tekstmeldinga var ikkje vanskeleg å skjøne.
Møtte ikkje til «dugnad»
Oppmøtet frå spelarstallen var likevel langt dårlegare enn laurdagskvelden. Berre Thor-Jørgen Spurkeland, samt «ideens far», Ole Henrik Gulliksen.
– Eg fekk svar frå eit par som skulle komme, og mykje latter, ler Folland.
Spelarutviklar Torbjørn Glomnes føreslo å spinne bilen ut. Med den tidlegare Sogndal-trenaren bak rattet, og nokre løft på bakenden, vart likevel det løysinga for å få bilen fri frå plasseringa.