Vil ha 60-sone gjennom strynefjellstunellane

Det er også eit framlegg som blir slakta av ordførarane i kommunane som soknar til Strynefjellsvegen.

For forslaget som går på redusert fartsgrense på kring 14 kilometer av fjellovergangen, inneber ikkje utbetring av breidda på tunnelen.

• LES OGSÅ: – Lovbrot kvar dag på Strynefjellet
• LES OGSÅ: Brannsjefen fryktar ulukkke i tunellane

– Eg forstår ikkje at dei vurderer det i det heile. Det er greitt at ein må ha litt gjenbruk av eksisterande vegnett og tunnelar, men dette var heilt håplaust. For dette er berre flikking, seier dagleg leiar ved Thor Tenden Transport, Rolf Olav Tenden.

Nytt rasoverbygg

Statens vegvesen er pålagde å finne ut kva som må til for å få tunnelane godkjende av EU sine tryggleikskrav innan 2019. Tenden er skuffa, og har vanskar med å ta på alvor, det Olav Terje Hove og Inge Alsaker frå vegvesenet presenterte i går. Ifølgje avisa Fjordingen utan særleg entusiasme.

Tunnelane treng ei kraftig oppgradering. Både utviding av eksisterande tunnelar er tidlegare blitt nemnt, men også nye tunnelar i same trase. No føresler vegvesenet redusert fartsgrense og eit nytt rasoverbygg i Grasdalen.

– Eg er skuffa over at dei går for billegaste og enklaste måten. Det er overraskande at dette går an i 2012, seier Tenden.

(Artikkelen held fram under TV-saka)

Denne videoen er dessverre ikke tilgjengelig. Kontakt oss dersom du har spørsmål.

– Heilt håplaust

Framlegget vil føre til to år med vinterstenging der vegen berre er open for kolonnekøyring tre gonger om dagen på grunn av anleggsarbeid.

Slikt gjer det vanskeleg å drive næringsverksemd, seier Tenden.

– Det er heilt håplaust. Eg har vel aldri hatt ein så dårleg vinter som i år på grunn av stengeregime. Tre gjennomkøyringar med den trafikken som er over Strynefjellet trur eg ikkje vi klarer ein vinter til, seier han resignert.

– Lett sjokkerte

I Stranda sit også Jan Ove Tryggestad og ristar på hovudet over framlegget.

Han trudde knapt det han høyrde på møtet med representantane frå vegvesenet.

– Vi var lett sjokkerte over at det er nokon i det heile som kan tenkje seg å føreslå noko slikt. Det var eit unisont og bastant krav om å avvise dette som framtidig alternativ, seier han og viser til utviklinga og trafikkauken Kvivsvegen vil medføre.

Blir dårlegare

Tryggestad trur ikkje at vegstyresmaktene har teke innover seg kor viktig Strynefjellet er. Han meiner, dersom framlegget blir gjennomført, at det vil føre til dårlegare regularitet og trafikkbilete.

Det vert truleg levering av KVU for Strynefjellet i mars. Det siste alternativet meiner han ikkje kan gjennomførast.

– Aust-Vest-sambandet må sjølvsagt oppgraderast i takt med utviklinga, seier han og varslar at kommunane vil ta til motmæle når framlegget blir sendt ut på høyring.

– Vil ha Sogn

– Eg tolkar det rett og slett slik som ein total mangel på røyndomsforståing, legg Tryggestad til og varslar han lobbyisme for å jobbe fram oppgraderinga Strynefjellet treng.

– Kjensla mi seier at dei vil ha trafikken via Sogn og aksen over Filefjell. Difor føler eg også at Strynefjellet har blitt ein liten tapar i høve til vegmidlar dei siste åra. Men dei må sjå at E6 blir vegen til Oslo for Nordfjord og Sunnmøre, legg Tenden til.

Denne videoen er dessverre ikke tilgjengelig. Kontakt oss dersom du har spørsmål.