Slik kan ei bru på Kystvegen bli

Det er det rådgivande ingeniørfirmaet Aas-Jakobsen som har lagt fram tre bruløysingar mellom Tongane på Rugsundøy i Bremanger til Biskjelneset i Vågsøy kommune i nord.

Prosjektleiar Randi Paulsen Humborstad i Kystvegen Måløy Florø seier det betyr mykje for prosjektet å få på plass desse forslaga på den planlagde 45-minuttsregionen mellom Vågsøy og Florø.

– Det eine alternativet er ei hengebru med spennvidd på 860 meter, eventuelt 980 meter. Eit anna alternativ er ei skråkabelbru med spennvidd på 860 meter, seier ho til NRK.no.

• LES OGSÅ: Nytt vegselskap kastar seg på i kampen om vegpengar

Meiner staden er eigna for bru

Humborstad seier det er gode forhold i sjøen for å byggje fundament og det er ingen hus som står der landsfesta kjem.

– Det er også kort tilknyting til hovudvegen på begge sider av brua. Dette er ein godt eigna stad for å byggje ei bru.

Styreleiar i Kystvegen Ålesund-Bergen og ordførar i Flora kommune, Bengt Solheim-Olsen, seier ei bru i ytre Nordfjord utan tvil vil vere det viktigaste bruprosjektet nokon gong i Sogn og Fjordane.

– På denne måten vil man ikkje berre knytte dei to næringslivsbyane Måløy og Florø, men også kommunane Bremanger, Vågsøy og Selje samt resten av Sunnfjordkommunane saman til eit felles bu- og arbeidsområde, seier han i ei pressemelding.

• LES OGSÅ: Berre Olden - Innvik blir finansiert

Vil koste om lag det same

Det er ingen vesentlege skilnader i kostnadane på dei tre alternativa og totalsummen ligg på 2,4 milliardar kroner inkludert moms. Styret i Kystvegen Måløy–Florø skal no sjå på alternativ til finansiering.

– Vi skal sjå nærare på brukarfinansiering, ferjeavløysingsmidlar og momsrefusjon, seier prosjektleiar Randi Paulsen Humborstad.

Kystvegen Måløy–Florø kom inn på den regionale trafikkplanen som blei vedteken på fylkestinget i desember.

– Fylkestinget sette opp tunnelen mellom Svelgen og Indrehus på førsteplass på marginallista. Når det gjeld forslaget om kryssing av fjorden med bru mellom Bremanger og Vågsøy, kom det litt i siste time. Men vi meiner det er meir framtidsretta med bru enn ferje, seier ho.

• LES OGSÅ: Veglobbyistar fekk vise seg fram for samferdsleministeren på Frp-årsmøtet