– Eg har kunngjort styret om at eg seier opp min stilling for å gå inn i partnarskap med Jan Olav Jørgensen og Bjørn Østbø i Idun Vesta, seier Høegh-Kron i ei pressemelding.
Dei siste vekene har Bergens Tidende avslørt korleis ein unik og svært lukrativ ordning, har gjeve Høegh-Krohn utbyte i millionklassen heilt sidan 2006.
Den administrerande direktøren kjem til å halde fram i oppseiingstida, men skal selja aksjane i Bradbenken Partner når han forlèt Argentum.
Næringsministeren kasta nesten heile styret
Sidan 2006 har Argentum-sjefen tatt ut over 135 millionar kroner i løn. I fjor åleine var utbyte på 24,5 millionar kroner.
Det er Nærings- og handelsdepartementet som eig selskapet, som vart oppretta i 2001. Målet til selskapet var å skapa avkastning og ein meir velfungerande kapitalmarknad for selskap som ikkje var på børsen.
Førre veke kunngjorde næringsminister John Christian Vestre at han kasta alle utanom eit styremedlem i Argentum, på grunn av denne utbyteordninga.
– Eg meiner at den samla ordninga verken står fram rimeleg eller er i tråd med moderasjonslinja denne regjeringa står for. Eg er heller ikkje fornøgd med den grad av openheit som er vist, sa Vestre til NRK.
Til Bergens Tidende seier konstituert kommunikasjonssjef i Argentum, Marius Parmann, at avgangen ikkje har noko med avsløringane dei siste vekene å gjera.
Til NRK seier Parmann at dei jobbar med å få overgangen til å handterast på best mogleg måte for utviklinga til selskapet.
–Kva kjem denne avgangen til å gjera for Argentum?
–Joachim Høegh-Krohn har gjennom 16 år leia Argentum og bygga opp ein sterk organisasjon som skapar fantastiske resultat for staten som eigar, seier Parmann.