Protesterer via storskjerm i Måløy

- Vi som har starta dette har som mål å få 2000 med i demonstrasjonen i Måløy, seier ein av initiativtakarane Øyvind Reed.

• LES OGSÅ: Helse Vest legg ned i Eid og Lærdal

Busslast med folk

For måndag morgon reiser fleire busslass med folk frå fylket til Oslo for å demonstrere for lokalsjukehusa framføre Stortinget. Slett ikkje alle har høve til å ta turen, men ønskjer likevel å støtte opp.

Difor vil dei ta teknologien i bruk i Måløy.

- Det var ein ide som dukka opp under nokre brødskiver i lunsjen. Eg er i eit firma som har slik teknologi tilgjengeleg. Så vi skal vise det som ein videokonferanse her i Måløy, seier Reed.

• LES OGSÅ: Sjukehuskampen i Sogn og Fjordane

Storskjerm

Arrangørane har leigd ein storskjerm på 50 kvadratmeter som skal stå ved Stortinget i Oslo, slik at dei som er i demonstrasjonstoget der får med seg demonstrasjonen frå torget i Måløy.

- Vi vil vise at sjukehuskampen betyr mykje for oss sjølv om vi ikkje har mogleheit til å reise til Oslo. Det er mange ildsjeler som har engasjert seg sterkt i saka, og no var det på høg tid at også vi engasjerer oss, seier han.

• LES OGSÅ: Legg ned føde- og ortopeditilbodet

1000 faklar i toget

Går alt som arrangørane vil, vert det 1000 skinnande faklar i toget måndag.

- Vi veit jo ikkje kor mange som kjem, men vi har sendt ut invitasjonar og pressemeldingar til mange. Så får vi sjå korleis det går. Men folk må møte i god tid før klokka 16.00 måndag, for vi byrjar sendinga like før aksjonen i Oslo startar, seier Reed.

• LES OGSÅ: - Det er for langt til Volda