Politiet åtvarar om glatte vegar i vest

Det er glatte vegar fleire stader etter at temperaturen sokk på Vestlandet natt til laurdag.

I Vestland fylke vart det først meldt om glatte vegar i Øygarden vest for Bergen.

I 11-tida kom det melding om ein bil som køyrde av vegen på Lustravegen i Luster lenger nord i fylket.

Klokka 11.25 snurra ein bil rundt og hamna på taket på Årøyvegen, fylkesveg 55, mellom Sogndal og Hafslo.

Sjåføren kom seg ut av bilen og var oppegåande, med nokre mindre skadar, truleg grunna alt det knuste glaset, ifølge politiet.

Trafikken stod stille i begge retningar medan brannvesenet trådde til for å fjerne alt det knuste glaset. Tre kvarter etter ulukka, vart delar av vegen opna klokka 12.10.

I 13-tida var vegen heilt open for trafikk, etter at entreprenør salta på strekninga.

– Det er vinterdekk som gjeld

– I dag er det minusgradar og kjølig og det er frose på vegen, så det er glatt i dag, seier innsatsleiar på staden frå politiet, Ina Wilhelmsen.

Ho tilrår bilistar å køyre forsiktig.

– Det er alltid skummelt når den første frosten kjem. Det gjeld å køyre forsiktig og redusere farten, seier ho.

Operasjonsleiar Tom Johannessen i Vest politidistrikt fortel om glatte vegar fleire stadar i fylket.

– Folk må vere veldig obs, det gjeld spesielt område som ligg i skugge. Det er nok litt lokalt, alt etter korleis fukta har lagt seg, held han fram.

Han peikar på at ulukkene i Sogn er på vegar som ligg tett på sjø.

– Det gjer at ein får fukt opp frå sjøen, kombinert med temperaturfall, seier Johannessen.

– Folk må køyre forsiktig i dag. Sommardekk er ikkje noko ein brukar no lenger. Det er vinterdekk som gjeld, slår han fast.

Også i Bergen har det vore glatte vegar. På riksveg 580 Flyplassvegen mellom Råtunnelen og Håvardstun var det er trafikkuhell i 14-tida som førte til køar på staden.