Vest politidistrikt har hatt ein patrulje på brannstaden gjennom natta, som melder om at brannen blussa opp i den eine bustaden torsdag morgon.
– Det er meldt om ein del røyk i gata ved branntomta. Vi har eit vaktlag frå brannvesenet med fire personar på plass, seier vaktleiar ved Alarmsentralen i Florø, Frode Eide.
Politiet opplyser om at det er kontroll på brannen.
– Det blei observert flammar i kjellaren til eitt av husa. Det er god kontroll og ikkje fare for spreiing, operasjonsleiar Steinar Hausvik i Vest politidistrikt.
Brannen er no sløkt.
Sleit med å få kontroll over brannen
Det var onsdag føremiddag at naudetatane rykte ut etter melding om brann på Torvmyrane i Florø.
Brannvesenet sleit med å få kontroll over flammane, opplyste Terje Brandsøy i Alarmsentralen til NRK.
Det blei bedt om forsterkingar frå det lokale brannvesenet i Eikefjorden for å handtere situasjonen.
Brannen spreidde seg fort, og det vart overtenning i alle fire rekkehusleilegheitene. Då byrja eit intenst arbeid for å hindre vidare spreiing.
– Vi fekk evakuert alle som var inne då det byrja å brenne, samt personar i nærliggande hus, seier politiets innsatsleiar Synnøve Domben til NRK.
Totalt skal 14 personar vere evakuert. Det er ikkje meldt om personskadar, og ingen er meldt sakna, opplyser politiet.
BRANN: Fire rekkehusleilegheiter er overtent på Torvmyrane i Florø.
Foto: Liv Standal / FirdapostenHar sett inn kriseteam
– Det som er viktig no er å ta hand om dei som er råka av dette. Vi har difor etablert eit kriseteam, seier kommunedirektør i Kinn, Terje Heggheim.
Kommunen vil så snart som råd ordne med eigne leilegheiter til dei som mista heimane sine i brannen.
Heggheim trur også at det er viktig at dei som stod opp i dette får nokon å prate med.
– Det var ei kolossal røykutvikling til tider og det må nok ha vore ei ganske stor påkjenning for dei som stod midt opp i dette. Eg trur det er viktig at dei får nokon å snakke med om kva dei har opplevd.
Brannvesenet har hatt problem med vasstilføringa i dag, og Heggheim seier at dei snarast vil sjå på kva dei kan gjere for å rette opp i dette.
– Det er mange hus i dette område og dersom det er slik at vi kan slite med vasstrykket i slike situasjonar så er vi pliktige til å sjå på det umiddelbart.
