Både kommunepolitikarane og eit fleirtal av innbyggjarane i øykommunen har sagt nei til vindkraftutbygging. Men ei gruppe småbarnsforeldre har ikkje gitt opp kampen.
Sissel Kråkås og 45 andre småbarnsforeldre vil nemleg ikkje ta nei for eit nei.
– Vi er frustrerte over utfallet, seier Kråkås til NRK.no.
Meiner kommunen må seie ja
Det er berre nokre veker sidan kommunestyret i Solund sa klart nei til vindkraft. Med ti mot fem røyster sa dei folkevalde nei til planane om å byggje ut til saman 88 vindturbinar. Med det følgde dei rådet som fleirtalet av innbyggjarane gav i januar.
- LES OGSÅ:
- LES OGSÅ:
- LES OGSÅ:
Men ikkje alle er ferdige med saka. 45 småbarnsforeldre har sendt brev til fylkespolitikarane i Sogn og Fjordane og til Norges vassdrags- og energidirektorat. Innbyggjarane ber NVE seie ja til vindindustri i Solund, og grunngjev dette med at det vil gje kommunen både arbeidsplassar og millioninntekter.
– Vi ser eit nødvendig inntektspotensial ved vindkraftutbygging for Solund kommune. Vi er ein kommune med stadig nedgang i folketalet, og denne pila kan ikkje fortsetje å peike nedover. Om ikkje pila snur oppover vil ikkje Solund vere eit levedyktig samfunn i framtida, seier Kråkås.
(Artikkelen held fram under biletet)
– Visste ikkje kva dei sa ja eller nei til
Ho meiner sulingane ikkje fullt ut visste kva dei sa ja eller nei til i folkerøystinga i januar.
Hadde avtalane med kraftselskapa vore klare, og innbyggjarane hadde visst at kommunen ville ha fått 26 millionar kroner i årleg eigedomsskatt, så hadde utfallet blitt eit anna, meiner Kråkås.
– Eg trur det ville blitt eit fleirtal for vindkraftutbygging, seier Kråkås.
- LES OGSÅ:
- LES OGSÅ: –
Spekulasjonar
Denne argumentasjonen fell kommunestyrerepresentant Tom Færøy tungt for brystet.
– Når vi har ei folkerøysting så rettar vi oss etter den. Eg er litt betenkt over at ein del i lokalsamfunnet vårt ikkje tek det inn over seg, seier Ap-politikaren.
Han meiner det blir feil å seie at folket og politikarane ville sagt ja dersom avtalane hadde vore ferdigforhandla.
– Den type spekulasjonar kan vi ikkje bruke i det politiske arbeidet i Norge. Då hamnar vi på ville vegar, seier Færøy.
Det er Norges vassdrags- og energidirektoratet som til slutt skal seie ja eller nei til vindkraft i Solund.