No vil han lage katastrofefilm frå Sogn og Fjordane

Einar Loftesnes er produsenten bak storfilmen Villmark 2. Allereie før den har hatt sin offisielle norgespremiere, avslører Loftesnes at han saman med regissør Pål Øie har eit nytt prosjekt på gong.

– Vi ser no på eit manuskript til ein katastrofefilm som tek for seg tunnelbrannar, seier Loftesnes.

• Les også: Ungdommane strøymde til førpremiera på Villmark 2
• Les også: Villmark-stjerna kom til premierefest i turhabitten

Harastølen vart litt for strigla

Det er enno langt fram før filmen vert ein realitet, men ambisjonen er som alltid at filmen skal bli lagt til Sogn, eller i det minste i Sogn og Fjordane.

– Eg prøver å legge alle mine prosjekt til Sogn. Der er det eg har min bakgrunn som historieforteljar, seier Loftesnes.

Villmark 2 er delvis filma på Harastølen i Luster. Handlinga dreier seg rundt dei mystiske kreftene som byrjar å røre på seg når bygget skal gjerast klart til riving.

– Det er eit fantastisk bygg som har fått sitt forfall. Så det har blitt ein skummelt plass som fungerer godt i ein skrekkfilm, seier Loftesnes.

• Les også: Baasmo Christiansen: – Mye lidelse i veggene
• Les også: Jakta spøkjelse på Harastølen

Størsteparten av scenene er likevel filma i Budapest, der Loftesnes seier det er lettare å finne gamle bygningar som enno ikkje er rivne. Utfordringa på Harastølen var at fleire av romma vart pussa opp for å huse flyktningar på 90-talet.

– Du har alltid følelsen av å vere på Harastølen, men for å skape den illusjonen trengde vi noko som såg eldre ut. Difor enda vi opp der nede slik at vi fekk filme slitne gangar og rom, seier Loftesnes.

Hekta på katastrofefilmar

Forgjengaren selde 150.000 billettar då den kom ut i 2003. Loftesnes kvir seg for å sette eit tal på kor mange dei no må selje for å seie seg nøgde.

– Vi håpar flest mogleg går og ser filmen, men vi har ikkje sett nokre tal på det, seier han.

Men eit anna mål har han klart føre seg.

– Det er å skremme vatnet av folk, seier Loftesnes.

Som no altså ser fram til å prøve seg i ein ny sjanger. Den storslåtte katastrofefilmen Bølgen har allereie gått sin sigersgang på norske kinoar og bana veg for andre som vil prøve seg.

– Det er det eg sjølv likar å sjå på kino. Eg ser stort sett alle katastrofefilmane som kjem ut, seier Loftesnes.