Førde har somla lenge - no vil Flora, Naustdal og Bergen ha Torsheim

Den kjende multikunstnaren er begynt å dra på åra, og fyller 74 år i november. I snart 25 år har han blitt lova eit permanent utstillingslokale i Førde, men ingenting skjer. No byrjar det å haste og Torsheim seier han no vurderer å ta med seg kunsten sin ein annan stad.

Og det skal ikkje stå på alternativa, både nabokommunane Naustdal og Flora, i tillegg til Bergen står med opne armar og tek han gjerne i mot.

– Har han lyst hit er han velkommen, er den klare beskjeden frå dei tre kommunane.

• LES OGSÅ: Vart lova galleri for over 20 år sidan, vurderer å ta med seg kunsten sin

– Ikkje den minste tvil

I kystbyen Florø meiner ordførar Bengt Solheim-Olsen at Oddvar Torsheim burde fått ei avklaring i forhold til eit eige galleri for lengst.

Sidan femtiårsdagen sin har kunstnaren høyrt snakk om at kunsten hans skal få eit lager i Førde, men dette har han slett ikkje lyst på.

– Dei snakkar stadig om eit lager, men det er ikkje det eg vil ha. Bilete skal sjåast, ikkje arkiverast, sa Torsheim til Firda tidlegare i veka.

Den argumentasjonen har Solheim-Olsen full forståing for.

– Det er ikkje den minste tvil om at viss vi skulle ein førespurnad frå kunstnaren sjølv, så ville vi gjere mykje for å leggje forholda til rette for eit Torsheim-museum i vår kommune, seier Flora-ordføraren.

• LES OGSÅ: Torsheim har venta i 24 år

– Det er tragisk

Også i nabokommunen Naustdal vil dei gjerne tilby Torsheim utstillingslokale for kunsten sin. Torsheim er opphavleg frå Naustdal, men bur i Førde.

Kommunestyrerepresentant for SV, Ole Erik Thingnes meiner det er trist at kunstnaren enno ikkje har fått sitt eige faste galleri.

– Det er tragisk. Eg må sjølv ta sjølvkritikk for at eg ikkje før har oppfatta at vi burde få laga til eit slikt galleri for Oddvar Torsheim i Naustdal, seier Thingnes.

Han meiner Naustdal kommune no må gripe sjansen og lage til eit galleri for dei karakteristiske verka.

– Vi er ein kunst og kulturkommune, iallfall likar vi å kalle oss det, så dette bør vi få til, seier SV-politikaren.

Han trur ikkje det skal bli noko problem å få dei andre politikarane i kommunen med på tanken.

Bergen også eit alternativ

Torsheim sjølv har lansert tanken om å ta med seg kunsten sin til Bergen. Til Bergensavisen seier han at han helst ser at galleriet kjem på beina før han er under torva.

– Dersom det ikkje blir mogleg å få til ei galleriløysing i Førde, er sjølvsagt Bergen interessant. Eg er jo barnefødt der, seier han til avisa.

Kulturbyråden i Bergen, Gunnar Bakke, er begeistra over Torsheim sitt frieri og seier inviterer han til byen.

• LES OGSÅ: Skuffet Oddvar Torsheim truer med å flytte til Bergen

Førde tilbyr mini-galleri

Etter at Torsheim stod fram i avisa og etterlyste eit permanent utstillingslokale ser det ut til at Førde kommune, som jo har lova han dette, er på veg til å snu. Same dag tok nemleg Førde-ordførar Olve Grotle til orde for eit mini-galleri.

– Vi prøver å få til ei ordning med det nye kunstmuseet der Oddvar Torsheim og kanskje fleire av dei fremste kunstnarane i Sogn og Fjordane gjerne kan få sin eigen plass, sa Førde-ordføraren til NRK.no tidlegare denne veka.

• LES OGSÅ: Førde-ordføraren vil gi Torsheim mini-galleri

Trur Torsheim-galleri blir populært

Det er no altså fire kommunar som gjerne vil ha eit Torsheim-galleri i kommunen sin. I Flora trur ordføraren at eit slik galleri vil bli populært.

– Han folkelege måte å formidle kunst på trur eg har gode moglegheiter til å trekkje til seg store mengder folk. Eg ser for meg eit galleri i sentrum, og trur kunsten også er aktuell som salsvare, seier Solheim-Olsen.