Mykje stengd - trass heilårsstatus

Ordførar i Vik, Marta Finden Halset meiner vegstenginga er problematisk for innbyggjarane.

- Men det er dessverre slik at vi ikkje rår over vêrgudande, seier Finden Halset til NRK.no.

Heilårsstatus stoggar ikkje vêret

Det var i 2009 at dåverande samferdsleminister Liv Signe Navarsete lova at riksveg 13 over Vikafjellet skulle vere vinteropen. Same år kom beskjeden om at vegen fekk status som stamveg.

• LES OGSÅ: Riksveg 13 blir stamveg

Dei to siste vintrane har difor vegen ikkje vore nattestengt.

Likevel har det blitt mange timar for vikjene utan veg over fjellet. Så langt i vinter har vegen vore stengd i 565 timar, medan det har vore kolonnekøyring i 80 timar.

- Vêrgudane bryr seg ikkje om kva politikarane på stortinget har bestemt. Sjølv om dei seier vegen skal vere open heile året gjer vêrgudane som dei vil, seier Finden Halset.

• LES OGSÅ: Måtte forlate snøfres etter skred

Stengd fire gonger så mykje

Alle dei store fjellovergangane i Sogn og Fjordane har vore meir stengde denne vinteren enn i fjor, viser tal frå Statens vegvesen. I hovudsak er dette fordi det har vore mykje vind.

• LES OGSÅ: Så mykje har fjella vore stengde

Tala frå Statens vegvesen viser at riksveg 13 over Vikafjellet har vore stengt nesten fire gonger så mykje denne vinteren som sist vinter.

Stengt 565 timar (156 timar og 8 minutt)
Kolonne 80 timar (132 timar og 20 minutt)

(Tala gjeld så langt i vinter, medan tal frå i fjor står i parentes)

(Artikkelen held fram under biletet)

Ras stengde vegen i ei veke

Her har ras og rasfare sett sine tydelege spor i loggboka. For i løpet av vinteren har det gått fleire store ras på strekninga.

Den 11. januar gjekk det eit stort ras som stengde vegen i fleire dagar.

Då vegen skulle opnast den 13. januar gjekk det nye ras medan Mesta prøvde å rydde fjellovergangen. Vegen vart då stengd igjen og opna ikkje før den 18. januar.

- Til saman vart vegen stend i om lag 160 timar i løpet av denne perioden. Så det er klart at det utgjer mykje i høve til den totale summen på 565 timar stenging, seier byggjeleiar Asbjørn Røneid i Statens vegvesen.

(Artikkelen held fram under biletet)

Kostbar strekning

Sidan 2009 skal altså riksveg 13 vere open heile vinteren. Vegvesenet har etter dette brukt mykje ressursar på vegen, med auka beredskap og meir utstyr.

- Det er ein relativt kostbar veg å halde open. Dette er nok den fjellovergangen i Sogn og Fjordane vi brukar mest ressursar på, seier Røneid.

Det har også vore problem med uvêr på denne fjellovergangen.

- Uakseptabelt

Ordførar Marta Finden Halset seier ho har stor tillit til at vegvesenet og entreprenøren Mesta gjer alt dei kan for å halde vegen open.

- Men alle må rette seg etter vêret, seier Finden Halset.

Ho meiner samtidig det er uakseptabel for innbyggjarane i Vik og for heile Sogneregionen at vegen som bind området saman med Voss og Bergen er så mykje stengd.

- Dette har med livskvalitet å gjere også. Folk ønskjer å ha den tryggleiken det er å vite at dei kan kome seg til og frå heile tida, seier Finden Halset.

Vil ha tunnel

Ho seier kommunen i nær 50 år har kjempa for å få til ein tunnel gjennom Vikafjellet, mellom Bødalen og Hola på Voss-sida. Denne er førebels ikkje prioritert og ordføraren er byrja bli utålmodig.

- No er det vår tur. Det vert brukt mykje ressursar på å halde vegen open, men som sagt vêret kan vi ikkje styre. Difor er den einaste løysinga at vi får ein tunnel, seier Finden Halset.

PS: Vinteren 2008/2009 var vegen Vikafjellet stengd i 1073 timar. I tillegg var vegen nattestengt i 1049 timar og det var kolonnekøyring i 226 timar. Dette året var prega av mykje uvêr, og vegen hadde heller ikkje status som heilårsveg.