Mot den nest dårlegaste eplehausten på femti år

I fjor vart det produsert 797 tonn eple i Sogn og Fjordane, 10 prosent av produksjonen i landet. Men i år blir det langt tøffare før bøndene. Årsaka er at våren var ein av dei kaldaste og fuktigaste som er registrert.

– Då blir det fort problem med blomstring for fruktbøndene. Det ser ut til at avlingane er dårlegare i år enn dei har vore på lang tid, seier fylkesgartnar Jon Anders Stavang.

• Les også: Her har det heilt gått i surr for epletrea...
• Les også: Han har funne den magiske fruktformelen

Sein og ujamn haust

Når våren er tøff spelar det lokale klimaet ei ekstra viktig rolle og det blir store skilnadar frå gard til gard og frå fjordstrøk til fjordstrøk. Verst ser den dårlege våren ut til å råke fruktbøndene i Hardanger og dels i Hordaland.

• Les også: Nattefrost skaper nervar i morellhagen til Anders

Men òg i Sogn og Fjordane har ein god del gardar låg produksjon, i tillegg til at den seine hausten skapar sine utfordringar.

– I tillegg til at avlingane er dårlege, er det òg sein og ujamn modning. Det er krevjande å få inn god kvalitet, for ein må hauste i mange omgangar for å få inn den frukta som heng på trea, seier Stavang.

Får økonomiske konsekvensar

Lenge var det frykta at fruktbøndene skulle få problem med å kome i mål med innhaustinga, men vart berga av ein varm september. I tillegg kan bøndene berge seg på å ha forskjellige sortar.

– Dei prøver så godt dei kan å ikkje ha berre ein kultur. Men at ein har fleire typar eple og gjerne plommer og kanskje morellar òg, som modnar til forskjellig tid. Er det ein av sortane som ikkje slår heilt til, så er det gjerne andre som held stand.

• Les også: Her dyrkar ho tusenvis av smakfulle druer
• Les også: Historisk god bringebærproduksjon

Men når året generelt blir dårleg, så får det konsekvensar for den enkelte bonden.

– Det går på økonomi. Når du får ei dårleg avling, så får du lågare inntekt, seier Stavang.