– Politiet ser svært alvorleg på dette, seier operasjonsleiar Tatjana Knappen i Vest politidistrikt.
Klokka 16.14 torsdag ettermiddag fekk politiet melding om at ein bil køyrde vinglete på riksveg 5 mellom Florø og Naustdal.
Dei fatta raskt mistanke om ruskøyring og rykte ut frå Førde. I Eikefjord i Kinn kommune blei bilen stansa.
Men det var slett ikkje rusmiddel mannen i 40-åra koste seg med langs den sterkt trafikkerte riksvegen. I staden synte det seg at han rett og slett såg på film.
– Det er jo svært alvorleg dersom ein har fokuset på ein skjerm i bilen i staden for på vegen, konstaterer Knappen.
Om det var ein bilfilm eller ei romantisk komedie mannen såg på, veit ikkje operasjonssentralen.
Uansett filmsmak, så fell ikkje filmsjåinga i god smak hos politipatruljen.
– Førarkortet blei beslaglagt på staden, konkluderer operasjonsleiaren.