Laurdag vart det avgjort kven som vart vinnaren av Mesternes meister på NRK1. I ein dramatisk finale mot Johan Remen Evensen var det Marco Elsafadi (37) som trakk det lengste strået.
37-åringen stråla etter sigeren og måndag sat smilet framleis laust då han gjesta Nitimen på NRK P1.
– Eg smiler litt ekstra no om dagen.
Var usikker
Basketspelaren fortalde at han fleire gonger i løpet av konkurransen var usikker på om det kunne bli han som stakk av med sigeren til slutt.
– Tanken om å vinna streifa meg, men for å vere ærleg så svikta motet undervegs ganske ofte. Når ein ser kva konkurrentar ein har å bryne seg mot så blir ein litt audmjuk.
– Men ein toppidrettsutøvar slepp ikkje tanken på å vinne før det er heilt over.
I dag vart det klart at i snitt over ein million menneske følgde med på årets utgåve av finalen i «Mesternes Mester».
Sterkt konkurranseinstinkt
Elsafadi seier at han har hatt eit stort vinnarinstinkt heilt sidan han var liten.
– Eg var ein av dei barna i barnehagen som gøymde meg i skapet og grein viss eg ikkje vann konkurransar. Og det kunne vera heilt uformelle ting som å konkurrera om å vera førstemann tilbake i barnehage frå leikeplassen og slike ting.
Men å ha eit sterkt konkurranseinstinkt har ei bakside. 37-åringen fortel at han har slite med den sterke vinnarviljen og at han har vore nøydd til å trena seg opp til å handtere tap.
– For eg har aldri skjønt det der «det viktigaste er å delta»-prinsippet. Klart det er viktig at alle har det hyggeleg, men det er ikkje vits å delta viss ein ikkje gjer det ordentleg, meiner Elsafadi.
Han meiner alle deltakarane i programmet har dette instinktet.
– Det er ein grunn til at dei har oppnådd resultat. Det har noko med hovudet å gjera.
Såg finalen med konkurrentane
I samband med finalen som gjekk på fjernsyn laurdag, var både deltakarar og andre knytt til produksjonen av programmet samla til fest.
– Det var kjekt å sjå finalen med dei andre. Eg har ikkje sett episodane før dei gjekk på fjernsyn. Det er artig å høyre kva dei andre deltakarane sa i intervjua før konkurransane, fortel Elsafadi.
No har han vendt tilbake til kvardagen i Bergen. Mellom anna spelar han i 2. divisjon med Askøy Basketballklubb.
– Det er minst like viktig å vinne der også, ler 37-åringen.