– Det tok ikkje lang tid før det poppa inn med meldingar, bestillingar og venneførespurnadar, seier Laila Garlid i Stryn – også kalla Lakk-Laila.
For det er lakk som er greia. Ho spraylakkerer hjelmar, motorsyklar, bilar og bensinkanner.
– Nokon blir heilt ville og vil ha slik sjølv, fortel Laila Garlid, når ho visar fram bilen sin – ein grundig dekorert Wolksvagen Transporter – med mellom anna ørnar og vakre damer.
Ei stor utfordring
Laila målar med ei sprøyte som heiter airbrush. Den fekk ho i bursdagsgåve for åtte år sidan, og sidan har det gått slag i slag. Når ho ikkje jobbar som assistent i heimetenesta, er det dette ho brukar tida si på.
– Det kjekkaste eg veit er å måle store motiv på store bilar, seier ho.
Som til dømes å måle ei vikingdame på ein lastebil. Sjåføren av bilen er fan av serien Vikings, og har gitt Laila ei ny utfordring.
– Det er første gong eg har laga eit portrett på ein lastebil. Eg er veldig spent på kva han seier.
400 postkassar
Men Laila får mange mindre oppdrag også. Folk vil ha kunsten hennar på bilde, skiferstein og postkassar.
– Eg har sikkert måla 400 postkassar. Det er veldig kjekt når folk blir fornøgde, for dei får alltid noko som ingen andre har, seier ho.
No har ho blitt spurt om å måle ein fjøs, og sjølv om ho likar alle typar oppdrag veit ho kva som ville vore ekstra stas:
– Eit fly. Tenk å få spraylakkere eit fly, seier ho.