- Det er trasig. Vi kjem jo ikkje forbi, og slik eg forstår det kjem entreprenøren for å opne vegen først på onsdag, seier Bjarte Loftheim.
Han er mjølkebonde på Loftheim i Askvoll, og er mellom dei ti personane som er råka av av steinraset som gjekk måndag morgon.
- LES MEIR:
1200 liter mjølk forgjeves
Ifølgje bt.no gjekk raset 300 meter frå huset hans. No stenger digre steinar vegen og tilgangen til resten av verda.
- Eg reknar med at omlag 40 tonn har rast ut, seier Loftheim.
Det store problemet er at isolasjonen går utover gardsdrifta. Måndag skulle Loftheim levere 1200 liter mjølk - men det kan han berre gløyme.
Etter tre døgn kan mjølka ikkje lenger brukast, og no må han i staden tømme ut heile produksjonen.
Saka held fram under kartet
Prøver å tenkje positivt
- Produksjonen har vore forgjeves, og det er sjølvsagt trasig. Dessutan er kona dyrlege, og ho må no leige bil dersom ho skal drive praksisen, seier han.
Han legg til:
- Men vi må prøve å tenkje positivt. Ikkje minst håpar vi no at sikringa av vegen skal bli gjort skikkeleg, seier Loftheim.
- Kommunen veit om sprekkane
Ifølgje mjølkebonden i Askvoll er det nemleg ein god del stein som framleis kan rase ut på staden: Opp mot 500 tonn ventar berre på å skli ut.
- Eg har følgt med denne bergveggen lenge no, og sprekkane berre veks. For nokre månader sidan gav eg beskjed om at kommunene måtte sjå på det - så dei veit om problema, seier Loftheim.
I 1997 skal ein geolog ha vore på staden.
- Eg håpar det blir trygt å bu her no. Eg skal iallfall stå på for at jobben på staden ikkje skal bli halvgjort, seier bonden.