Den 11 kilometer lange strekkja av E39 gjennom Astrup-bygda er nemlig via plass i regjeringa sitt reviderte nasjonalbudsjett.
Budsjettet vert lagt fram førstkommande tysdag.
– Prosjektet har vore gryteklart lenge. I dag er eg svært glad på vegne av trafikantane, jølstringane og Jølster kommune, jublar han overfor NRK.
Blir framskunda
Reguleringsplanen var ferdig i 2013, og skuffelsen var stor parsellen ikkje kom med i førre nasjonalbudsjett. I handlingsplanen for førre Nasjonal Transportplan låg utbetringsarbeidet inne med oppstart i 2017.
No blir det altså oppstart allereie til hausten.
– Vi har jobba med å få Bjørset - Skei inn i revidert, og vi håpa på det. Når vi no får 20 millionar så er vi svært nøgde med regjeringa i dag, seier Klakegg.
– Vi har gjennomslag
Heile kostnadsråma på prosjektet er nær 700 millionar kroner. Klakegg seier anbodspapira ligg klare til å bli sendt ut på anbod.
– Vi har vore gjennom innleiande arbeid i høve til grunnerverv. Her kan ein kanskje byrje å rigge, men det blir nok 2016 som blir sjølve oppstarten på den faktiske utbygginga i vegen, seier han.
Fylkesleiar Lars Svein Drabløs i Frp deler gleda til Klakegg og meiner framskundinga viser at partiet har gjennomslag i departementet.
– Det er alltid vanskeleg å få framskynda prosjekt. Samferdsleminister Ketil Solvik-Olsen har også sjølv sett kva problem strekkja i Jølster utgjer, seier han.
Nøgd Mjømen
Strekkja langs Jølstravatnet er enkelte stader svært smal. Fylkesleiar i Høgre, Arve Mjømen, seier det er viktig å komme raskt i gang med arbeidet.
– Med dei tydelege signala regjeringa har gitt på at E39 skal prioriterast så må vi syte for ein optimal framdrift på prosjekta, og då må vi få løyvd pengane etter kvart som prosjekta er klare, seier han i pressemeldinga.
– Måtte vere med
Frp sin fylkesleiar seier at dette har vore svært viktig i Sogn og Fjordane Frp sin dialog med politisk leiing i samferdsledepartementet.
– Seinast på vårt Landsmøte for ei veke sidan var vi svært tydeleg ovanfor samferdsleministeren om at dette prosjektet måtte vere med i Revidert nasjonalbudsjett. Det er godt å sjå at det vart følgt opp så raskt, seier Drabløs.
- Les også:
– Svært viktig for framdrifta
Fylkesleiar i regjeringa sitt samarbeidsparti Venstre, Gunhild Berge Stang, seier at dette har vore ei viktig sak for Venstre i forhandlingane om budsjetta.
– Venstre foreslo å løyve desse pengane allereie i statsbudsjettet for 2015, men det er bra at regjeringa no føl opp dei signala vi kom med, og no løyver midlane, seier ho.
Trude Brosvik, fylkesleiar i KRF, seier at dette er svært viktig for å sikre framdrifta på prosjekta på E39 i fylket.
– Vi har mange viktige prosjekt som ventar i kø, og vi konkurrerer med prosjekt i dei andre Vestlandsfylka. Dette er berre eit av prosjekta, seier Brosvik.
- Les også: