Landstraumanlegget står ubrukt halve sommaren

– Me har tre supplybåtar som kan kopla seg til landstraumkontakten. Det er synd at den kaiplassen blir oppteken av cruisebåtar når me treng den, seier driftssjef i Solstad Shipping, Tor Inge Dale.

Dei har investert mellom éin og to millionar for å legga til rette for landstraum i supplybåtane sine. Ein av båtane blei nyleg vist vekk frå Skolten Syd 3 – den einaste kaiplassen med landstraum i Bergen.

• Les også: Cruisenæringa vil ikkje investere i landstraum ​

– Me håpar Bergen Havn utvidar kapasiteten og ikkje reduserer, slik dei gjer no.

– Cruiseskipa treng terminalen

Landstraumanlegget i Vågen er ikkje tilrettelagt for cruiseskip.

Likevel er enkelte cruiseskip nøydde til å stå på akkurat denne kaiplassen, forklarar konstituert hamnedirektør Ulrik Jørgensen.

– Cruiseskipa som er booka inn på Skolten Syd 3, har såkalla «snuhamnstatus». Det vil seie at passasjerane byrjar eller sluttar reisa i Bergen, og då treng me ein terminal for å handtere passasjertrafikken.

– Er det ikkje litt dumt at supplyskipa ikkje får bruke landstraum?

– Jo. Me vil jo bruke anlegget så mykje som mogleg. Det hadde vore det ideelle. Landstraumanlegget blei plassert der fordi det var det enklaste å få til med tanke på kabelnettet BKK kan tilby.

• Les også: No kan norske hamner søke om støtte til landstraum

Bergen Havn har søkt om 185 millionar til fleire landstraumanlegg. Om søknaden blir innvilga, vil dei nye landstraumanlegga ligge på Skolten, Bontelabo, Festningskaien, Havforskinga, Hurtigruteterminalen og Dokken.

– I søknaden ligg det også to punkt for oppkopling av cruiseskip som går på landstraum, fortel hamnedirektøren.

Forventar ei opprydding

Julie Andersland (V), byråd for klima, kultur og næring, meiner landstraum er viktig for å redusere forureininga.

– Supplyskip skal sjølvsagt ha tilgang til landstraumanlegget. Det er uheldig at cruiseskip sperrar for andre.

Fordi avtalane med cruiseskipa er eldre enn landstraumanlegget, er det ikkje teke omsyn til supplybåtane.

– Eg forventar at dette blir rydda opp i når nye avtalar med cruiserederia blir inngått, slik at problemet ikkje gjentek seg, seier Andersland.

– Må stilla krav til skipa

I tillegg til å installere landstraumanlegg til cruiseskip, meiner Heikki Holmås (SV) at cruise- og supplyskip må bli pålagt å legge til rette for landstraum.

– Det store problemet er at dei fleste av cruiseskipa og offshorefartøya ikkje kan ta imot landstraum, meiner Holmås.

Han meiner det blir dyrt for Bergen Havn å investere i infrastruktur viss dei ikkje er sikre på at cruiseskipa tar imot landstraum.

– Mange andre stader i verda stiller dei krav om at cruisebåtar skal ta imot landstraum, og det burde me gjera i Noreg også.

• Les også: Cruisenæringa vil ikkje investere i landstraum